Konstıtýtsııalyq reforma saıası turaqtylyq pen bılik tepe-teńdigin nyǵaıtady — sarapshy
ASTANA. KAZINFORM — Qazaqstandaǵy jańa Konstıtýtsııa jobasy boıynsha ótkiziletin aldaǵy referendým eldiń saıası júıesin damytýda mańyzdy kezeń bolýy múmkin, parlamenttiń rólin kúsheıtip, ınstıtýttyq tepe-teńdik mehanızmderin nyǵaıtady dep sanaıdy Azııa máseleleri boıynsha mysyr sarapshysy Ahmed Abdo Tarabık.
Sarapshynyń pikirinshe, prezıdenttiń keńeıtilgen ókilettiligi bar modelden parlamentke mańyzdy ról beriletin júıege ótý Qazaqstannyń saıası qurylymyna teńgerimdi sıpat berýi múmkin.
— Kúshti parlament, keńeıtilgen ókilettilikterge ıe bolǵan jaǵdaıda, bılik tarmaqtary arasyndaǵy qajetti tepe-teńdikti qamtamasyz ete alady, — dedi sarapshy.
Ahmed Abdo Tarabıktyń oıynsha, usynylyp otyrǵan ózgerister tek saıası salaǵa ǵana emes, sonymen qatar eldiń áleýmettik-ekonomıkalyq damýyna da oń áser etýi múmkin, sebebi olar qoǵamnyń saıası protseske keńirek qatysýyn qarastyrady.
Sarapshy bir palataly parlament ıdeıasyna da erekshe nazar aýdardy. Onyń pikirinshe, parlamenttik ókilettilikterdi bir palata sheńberinde shoǵyrlandyrý zań shyǵarýshy organdy tolyq jáne tıimdi etip, úkimet qyzmetin baqylaýdy kúsheıte alady.
— Parlament keńeıtilgen baqylaý ókilettilikterine ıe bolǵan jaǵdaıda, atqarýshy jáne zań shyǵarýshy bılik arasyndaǵy naqty tepe-teńdik qalyptasady. Mundaı jaǵdaıda júıe bir bılik tarmaǵynyń ústemdigine az beıim bolady, — dedi ol.
Konstıtýtsııalyq reforma sheńberinde jańa ınstıtýttar qurý týraly sóz qozǵaǵan sarapshy ókildik mehanızmderdi, sonyń ishinde Qazaqstan halyq keńesin qurýdy kúsheıtý saıası ómirge qosymsha serpin beretinin atap ótti. Onyń pikirinshe, bul ártúrli áleýmettik toptardyń saıası protseske qatysýyn nyǵaıtady.
Sondaı-aq jobada qarastyrylǵan vıtse-prezıdent laýazymyn engizý jóninde Ahmed Abdo Tarabık mundaı model memlekettik basqarý júıesiniń turaqtylyǵyn arttyra alady dep málimdedi.
— Demokratııalyq júıelerde vıtse-prezıdent ınstıtýty basqarýdyń tıimdiligin arttyrady, ásirese ishki jáne syrtqy jaǵdaılardyń joǵary dınamıkasy kezinde, — dep atap ótti sarapshy.
Onyń aıtýynsha, Qazaqstandaǵy saıası modernızatsııa protsesi sheteldiń nazaryn aýdardy, al Konstıtýtsııalyq ózgeristerdiń jańa kezeńi eldiń halyqaralyq ımıdjin reformalardy júıeli júrgizetin memleket retinde odan ári nyǵaıta alady.
— Saıası reformalardyń bastalýynan beri Qazaqstan oılanyp jasalǵan, teńgerimdi ózgerister júrgizip otyrǵan memleket retinde qabyldanady. Bul onyń halyqaralyq arenadaǵy bedeline áser etip, eldegi ózgeristerge qyzyǵýshylyqty arttyrady, — dep qorytyndylady Ahmed Abdo Tarabık.
Aıta keteıik, Memleket basshysy azamattarymyz jańa Konstıtýtsııa jobasyn qoldaǵan jaǵdaıda elimizdiń turaqty damýyna jol ashatyn saıası júıe qalyptasatynyn aıtty.
Oǵan qosa, Prezıdent azamattar referendýmda jańa Konstıtýtsııa jobasyn qoldap jatsa, elimizdiń saıası qurylymy túbegeıli ózgeredi dep atap ótti.
