Konstıtýtsııalyq reforma: Prezıdentke qandaı laýazym ıelerin taǵaıyndaý quqyǵy beriledi

ASTANA. KAZINFORM — Konstıtýtsııalyq reformalar jónindegi komıssııanyń ekinshi otyrysynda Ádilet mınıstri Erlan Sársembaev Prezıdentke qandaı laýazym ıelerin taǵaıyndaý quqyǵy beriletinin  aıtty.

- Prezıdent eń joǵarǵy laýazymdy tulǵa retinde memlekettiń jumys isteýi úshin negizgi jaýapkershilikti arqalaıdy. Osyǵan oraı, Konstıtýtsııada Prezıdenttiń Quryltaıdyń kelisimimen, onyń depýtattarynyń jalpy sanynan kópshiliktiń daýysymen kelesi laýazymdarǵa taǵaıyndaý quqyǵyn bekitý usynylady: Qazaqstan Respýblıkasynyń vıtse-prezıdentin, Qazaqstan Respýblıkasynyń Premer-mınıstrin, Konstıtýtsııalyq sottyń 10 sýdıasyn, Ortalyq saılaý komıssııasynyń 6 múshesin, Joǵary aýdıtorlyq palatanyń 8 múshesin, - dedi mınıstr.

Onyń aıtýynsha, bul rette Prezıdentke atalǵan laýazymdardy taǵaıyndaýǵa bir nemese birneshe ret kelisim berýden bas tartqan jaǵdaıda Quryltaıdy taratý quqyǵy beriledi. Bul qurylym aldyn alý fýnktsııasyn atqaryp, saıası kúshterdi ymyra izdeýge jáne jaýapkershilikpen áreket etýge yntalandyrady.

- Jalpy usynylǵan model Prezıdent pen Quryltaı arasynda tepe-teńdik qalyptastyryp, Memleket basshysynyń bastamashyl rólin depýtattar korpýsymen sheshýshi daýys alý arqyly úılestiredi. Usynylǵan tásil Memleket basshysynyń taǵaıyndaýlaryn tek Quryltaıdyń kelisimimen júzege asyrýdy qarastyratyny túbegeıli mańyzdy ekenin atap ótken jón. Bul erejeler memlekettik júıeniń tıimdiligin kúsheıtetini sózsiz. Sebebi júıe tulǵalarǵa emes, memlekettik basqarý ınstıtýttarynyń sapasyna táýeldi, - dedi Erlan Sársembaev.