Konstıtýtsııalyq reforma parlamenttik ózgeristermen shektelmeıdi — depýtat

ASTANA. KAZINFORM — Qazaqstandaǵy konstıtýtsııalyq reformalar bastapqyda parlamenttik júıeni jetildirý aıasynda qarastyrylǵanymen, qoǵamnan túsken usynystardyń aýqymyna baılanysty keńeıtildi. Bul týraly Májilis depýtaty, Konstıtýtsııalyq reformalar jónindegi komıssııa múshesi Aıdos Sarym Jibek Joly telearnasyna bergen suhbatynda aıtty. 

Depýtattyń aıtýynsha, reformanyń alǵashqy kezeńinde jumys toby negizinen Parlamentke qatysty normalarmen aınalysqan. Alaıda memlekettik organdarǵa jáne Prezıdentke kelip túsken usynystardyń mazmuny bul tásildiń jetkiliksiz ekenin kórsetti.

Qoǵam tarapynan kóterilgen bastamalardyń edáýir bóligi Konstıtýtsııanyń birinshi jáne ekinshi taraýlaryna baǵyttalǵan. Sonyń biri — advokattardyń konstıtýtsııalyq mártebesin aıqyndaý jónindegi usynys. Depýtat bul máseleniń uzaq jyl boıy kóterilip kele jatqanyn atap ótti.

— Advokattar sot protsesiniń tolyqqandy qatysýshysy retinde ózderiniń mártebesin Konstıtýtsııa deńgeıinde bekitýdi usynyp keledi. Alaıda bul bastama parlamenttik reforma formatyna syımaǵan. Mundaı bastamalar konstıtýtsııalyq deńgeıde qarastyrýdy talap etedi, — dedi ol.

Aıdos Sarym 1995 jylǵy Konstıtýtsııa qabyldanǵan kezeń men qazirgi qoǵamdyq-saıası jaǵdaıdyń aıyrmashylyǵyna da nazar aýdardy. Onyń aıtýynsha, sol kezde memleket endi qalyptasý kezeńinde bolsa, búginde ınstıtýtsıonaldyq jáne quqyqtyq talaptar aıtarlyqtaı ózgergen.

Depýtattyń pikirinshe, osy faktorlardyń barlyǵy Konstıtýtsııalyq jınalys shaqyryp, arnaıy komıssııa qurý qajettigin týyndatty. Qazirgi tańda bul jumysqa Parlament palatalary, sot organdary, memlekettik mekemeler, ǵylymı jáne saraptamalyq uıymdar tartylǵan.

— Bul tek shekteýli toptyń jumysy emes. Protseste myńdaǵan adamnyń múddesi jatyr. Sondyqtan Konstıtýtsııaǵa eleýli ózgerister engizilýi múmkin, — dep túsindirdi Aıdos Sarym.

Aıta keteıik, buǵan deıin Aıdos Sarym osy aptada Prezıdentke Konstıtýtsııanyń qorytyndy mátini usynylýy múmkin ekenin aıtqan.