Konstıtýtsııalyq reforma ınvestorlardyń Qazaqstanǵa degen senimin arttyrady – AQSh sarapshysy
ASTANA. KAZINFORM – 1 shildede kúshine engen konstıtýtsııalyq reformalar, eń áýeli, memlekettiń ınstıtýtsıonaldyq qurylymyn jetildirýge jáne basqarý júıesiniń tıimdiligin arttyrýǵa baǵyttalǵan. Bul jóninde The Atlantic Council’s Eurasia Center-diń shtattan tys ǵylymı qyzmetkeri, Eýrazııa boıynsha sarapshy Mark Temnıtskıı Vashıngtondaǵy tilshimizge bergen suhbatynda málimdedi.
Onyń sózinshe, bul ózgerister Qazaqstannyń Táýelsizdik jyldaryndaǵy eń mańyzdy saıası transformatsııasynyń qatarynda.
— Vıtse-prezıdent saılanbaıdy, ony prezıdent taǵaıyndaıdy. Odan bólek, prezıdenttiń parlamentti taratý quqyǵy saqtalady. Mundaı ózgerister atqarýshy bıliktiń quziretin keńeıtkennen góri memlekettiń saıası qurylymyn ońtaılandyrady, — dedi Mark Temnıtskıı.
Sarapshynyń pikirinshe, konstıtýtsııalyq reformalardy, eń aldymen, ınstıtýtsıonaldyq jańǵyrý dep qarastyrǵan durys. Olar memlekettik basqarýdyń tıimdiligi men turaqtylyǵyn arttyrady.
Sonymen birge ózgeristerdiń sátti bolýy jańa ınstıtýttarǵa emes, olardyń is júzinde qalaı júzege asýyna baılanysty.
Mark Temnıtskıı rettelgen zańnama júıesiniń jáne vıtse-prezıdent ınstıtýty arqyly bekitilgen mırasqorlyq mehanızminiń artyqshylyqtaryn atap ótti. Olar memlekettik basqarýda aldyn ala boljaý múmkindigin beredi. Bul Qazaqstan úshin óte mańyzdy. Óıtkeni el turaqty saýda, energetıka jáne Orta dálizdegi asa mańyzdy paıdaly qazbalardy óndirý ortalyǵy retinde pozıtsııasyn nyǵaıtyp keledi.
— Ondaı boljaý múmkindigine aımaqtyń turaqtylyǵyna múddeli sheteldik ınvestorlar men halyqaralyq seriktester oń qabaq tanytady, — dedi maman.
Onyń aıtýynsha, Qazaqstannyń boljaý múmkindigi bar ınstıtýtsıonaldyq qurylymy AQSh-ta da oń baǵalanýy múmkin. Sebebi atalǵan memlekette Ortalyq Azııanyń turaqtylyǵyna jete mán beriledi. Sırek paıdaly qazbalardy óndirý, energetıkalyq baǵyttardy ártaraptandyrý jáne Eýropa men Azııany baılanystyratyn Orta dálizdiń damýynda atalǵan aımaqtyń mańyzy zor.
Sarapshynyń kózqarasynsha, reformalar Qazaqstannyń teńgerimdi syrtqy saıasatyn nyǵaıtady. AQSh, Eýropalyq Odaq, Reseı jáne Qytaımen bir mezgilde syndarly qarym-qatynas ustanýǵa múmkindik beredi.
— Túsinikti ári rettelgen ınstıtýtsıonaldyq júıe Qazaqstandy amerıkalyq bıznes pen ınvestorlar úshin uzaq merzimdi jobalar turǵysynan tartymdy, senimdi seriktes qylady, — dedi Mark Temnıtskıı.
Aıta keteıik, buǵan deıin konstıtýtsııalyq reforma Qazaqstannyń saıası jańarýyna jol ashatyny jónindegi brıtandyq sarapshylar pikirin jarııalaǵanbyz.
