Konstıtýtsııalyq reforma: e-Otinish pen eGov arqyly ǵana 600-den astam usynys túsken
ASTANA. KAZINFORM — Memlekettik keńesshi — Konstıtýtsııalyq komıssııa tóraǵasynyń orynbasary Erlan Qarın Konstıtýtsııalyq reformany azamattyq qoǵam qalaı qabyldaǵanyn aıtty.
— Mundaı aýqymdy túzetýler kezinde azamattardyń da pikiri eskerilýi tıis. Sol sebepti 14 qazanda azamattardyń usynys-pikirin jınaqtaý úshin e-Otinish jáne eGov portaldarynda «Parlamenttik reforma» degen arnaıy bólim ashyldy. Parlamentarızm ınstıtýty kelip túsken usynystardy jınaqtap, júıeleýmen aınalysty. Sonymen qatar bul iske Zańnama jáne quqyqtyq aqparat ınstıtýty, Strategııalyq zertteýler ınstıtýty tartyldy. Bul qurylymdar parlamentarızmge qatysty halyqaralyq tájrıbeni bir aı boıy muqııat zerdeledi. Osylaısha, Jumys tobynyń múshelerine barlyq aqparat pen taldaý nátıjeleri usynyldy. Qazan aıynan beri parlamenttik reformaǵa qatysty usynystar túgel jınaqtaldy, — dedi Erlan Qarın Konstıtýtsııalyq komıssııanyń alǵashqy otyrysynda.
Ol Jumys tobynyń múshelerine óz usynys-pikirlerin ázirleýge bir aı ýaqyt berilgenin eske saldy.
— Jumys tobynyń múshelerimen qatar, Amanat, Aýyl, Respublica, Aq jol, Qazaqstan halyq partııasy, Jalpyulttyq sotsıal-demokratııalyq partııasy ózderiniń oı-pikirin daıyndap, joldady. Sondaı-aq «Baıtaq» partııasy, «Jańarý» sybaılas jemqorlyqqa qarsy qozǵalysy, Respýblıkalyq advokattar alqasy, «Toqtamys» advokattar qaýymdastyǵy, Halyqaralyq arbıtraj jáne medıatsııa palatasy, Parlamentarızmdi damytý qory, Ekonomıkalyq saıasat ınstıtýty, «Azamattyq bastama» bastamashylyq toby jáne basqa da uıymdar óz usynystaryn joldady, — dedi ol.
Memlekettik keńesshi konstıtýtsııalyq reformaǵa qatysty 7 saıası partııa, 16 qoǵamdyq uıym óz usynystaryn jibergenin, al, e-Otinish jáne eGov portaldary arqyly azamattar men qoǵam belsendileri tarapynan 600-den astam usynys túskenin atap ótti.
Aıta keteıik, Jibek Joly arnasy Konstıtýtsııalyq reforma jónindegi komıssııanyń birinshi otyrysyn tikeleı efırde kórsetip jatyr.
Buǵan deıin Konstıtýtsııalyq komıssııanyń quramynda kimder kirgenin jazǵan edik.