Konstıtýtsııalyq reforma bılikti azamattarǵa jaqyndata túsýi kerek – depýtat
ASTANA. KAZINFORM – Qazaqstandaǵy konstıtýtsııalyq reforma memlekettik bılikti barynsha ashyq, qoǵam aldynda esep beretin jáne azamattarǵa jaqyn etýge baǵyttalǵan. Májilis depýtaty Ashat Rahymjanov Konstıtýtsııalyq reforma jónindegi komıssııanyń úshinshi otyrysynda osyndaı oı aıtty.
Onyń sózinshe, usynylyp otyrǵan ózgerister formaldy jańǵyrtý sheńberinen shyǵyp, memlekettik basqarýdyń jańa arhıtektýrasyn qalyptastyrýǵa arnalǵan.
– Áńgime bılik ashyq ári qoǵamǵa esep beretin, al ınstıtýttar jedel ári ádil jumys isteıtin memlekettiń jańa arhıtektýrasy týraly bolyp otyr. Búginde adamdardy kez kelgen quqyqtyq tujyrymdardan góri kóbirek tolǵandyratyn bir qarapaıym suraq bar. Osy reformadan keıin memleket adamdarǵa jaqyndaı túse me? Jaýabymyz «ıá» bolsa, demek biz durys baǵytta kele jatyrmyz dep oılaımyn, - dedi depýtat.
Sondaı-aq ol reformanyń tıimdiligi jańa ınstıtýttardyń sanyna qaraı emes, azamattardyń ómirindegi naqty ózgerister arqyly baǵalanýǵa tıis ekenin atap ótti. Ashat Rahymjanov adam quqyqtary men bostandyqtaryna beriletin kepildikterdi keńeıtýdiń, sonyń ishinde zańda belgilengen rásimderdi saqtaı otyryp, beıbit jınalystar ótkizý quqyǵyn qamtamasyz etýdiń mańyzdylyǵyn eske saldy.
– Biz Konstıtýtsııany Konstıtýtsııa úshin ózgertip otyrǵan joqpyz. Biz Konstıtýtsııany adam úshin ózgertip otyrmyz, - dedi ol.
Depýtat Qazaqstanda júrgizilip jatqan reformalardyń álemdegi demokratııalyq úderisterge saı keletinin jáne halyqaralyq sotsıal-demokratııalyq qaýymdastyq tarapynan qoldaý tabatynyn aıtty.
– Bul eldegi konstıtýtsııalyq ózgeristerdiń oqshaý saıası eksperıment retinde emes, jahandyq demokratııalyq transformatsııanyń bir bóligi retinde qabyldanyp otyrǵanyn kórsetedi, - dedi Májilis depýtaty.
Aıta ketý kerek, Konstıtýtsııalyq komıssııa otyrystarynda usynylyp jatqan bastamalar men normalardyń qaısysy qabyldanyp, qaısysy Ata zańǵa enbeıtinin referendým sheshedi. Dál qazir Konstıtýtsııalyq reforma jónindegi komıssııanyń ekinshi otyrysy ótip jatyr.