Konstıtýtsııalyq reforma bárinen buryn adamǵa baǵyttalǵan — Marat Báshimov
QYZYLORDA. KAZINFORM — Jańa Konstıtýtsııanyń qabyldanýy qoǵamdyq qarym-qatynastaǵy, memlekettik basqarý júıesindegi jáne azamattardyń quqyǵyn qorǵaý baǵytyndaǵy sapaly ózgeristerdiń bastaýy bolǵaly tur. Konstıtýtsııalyq reforma jónindegi komıssııa múshesi, memleket qaıratkeri Marat Báshimov osylaı pikir bildirdi.
— Jańa Konstıtýtsııa ómirde júzege asyrylýy tıis jańa prıntsıpter men erejelerdi bekitedi. Qazaqstandyqtar bul ózgeristerdi Konstıtýtsııa árbir adamnyń quqyǵyna tikeleı áser etetindikten asyǵa kútedi. Ol jeke, tsıfrlyq, áleýmettik-ekonomıkalyq jáne eńbek quqyǵyn qorǵaý tetikterin kúsheıtedi. Ásirese, adamnyń jeke qaýipsizdigine, adam ómirine erkinen tys aralasýdan qorǵaýǵa jiti kóńil bólinedi, — dedi Marat Báshimov.
Ol basty zańnyń kúshine enýimen birge ınstıtýtsıonaldy reformalar jumys isteı bastaǵanyn atap ótti.
— Endigi zań shyǵarý bıligi Quryltaıda. Bul zańdardyń tezirek qabyldanyp, sapaly ári kásibı bolýyna baǵyttalǵan. Kásibı Parlament qurylady, memlekettik basqarý júıesi túbegeıli ózgeredi. Quryltaıdyń zań shyǵarýdaǵy róli meılinshe artady, — dedi ol.
Báshimovtiń sózinshe, jańa Konstıtýtsııa sondaı-aq atqarýshy bıliktiń qyzmetindegi parlamenttik baqylaýdy kúsheıtedi.
— Myna nársege basa mán berýimiz kerek, Konstıtýtsııada alǵash ret depýtattardyń úshten ekisi mınıstrdiń jumysyn tıimsiz dep baǵalap, Prezıdentke usynys joldasa, Memleket basshysy mınıstrdi ornynan bosatý týraly sheshim qabyldaı alatyn norma paıda boldy. Bul árbir mınıstr halyq aldyndaǵy jaýapkershilikti tereń túsinip, zańdardyń oryndalýy úshin barynsha tıimdi jumys isteýge kúsh salatynyn kórsetedi, — dedi Marat Báshimov.
Ol jańa konstıtýtsııalyq úlgi búgingi zamannyń syn-tegeýrinderine saı keletinin, bárinen buryn azamattardyń ómir sapasyn arttyrýǵa baǵyttalǵanyn aıtty.
— Qazirgi zamannyń qajettiligine jáne eskertýine jaýap beretin konstıtýtsııalyq reforma jasaldy. Reformanyń basty maqsaty — adamdardyń ómir sapasyn arttyrý, olardyń quqyǵyn qorǵaý jáne azamattardyń áleýmettik-ekonomıkalyq jaǵdaıyn jaqsartý, — dedi ol.
Buǵan deıin Marat Báshimov saıası reformanyń basty mindeti — azamattardyń konstıtýtsııalyq quqyǵy shynaıy qorǵaýdy qamtamasyz etý ekenin aıtqan bolatyn.
