Konstıtýtsııalyq reforma azamattardyń memlekettik basqarýǵa qatysýyn keńeıtedi – AQSh sarapshylary
ASTANA. KAZINFORM – Qazaqstandaǵy konstıtýtsııalyq reformalar azamattardyń memlekettik basqarý isine qatysýyn keńeıtip, halyqtyń el damýyna yqpal etý múmkindigin arttyrady. Bul týraly Kazinform agenttiginiń Vashıngtondaǵy menshikti tilshisine AQSh sarapshylary málimdedi.
The America-Eurasia Center uıymynyń vıtse-prezıdenti Ralf Vınnıdiń pikirinshe, reformalar azamattardyń memlekettik basqarýǵa qatysý múmkindigin keńeıtýimen erekshelenedi.
– Qazaqstandaǵy konstıtýtsııalyq reformalardyń mańyzy zor, sebebi bul ózgerister bıliktiń edáýir bóligin halyqtyń qolyna berýge baǵyttalǵan. Azamattarǵa eldiń damý baǵytyn, bolashaǵyn jáne memlekettik basqarý júıesiniń qalaı jumys isteýi kerektigin aıqyndaýǵa múmkindik beredi, – dedi sarapshy.
Ol sondaı-aq Konstıtýtsııalyq sottyń qurylýyna erekshe toqtaldy. Ralf Vınnıdiń aıtýynsha, bul ınstıtýt azamattar men ınvestorlardyń quqyqtary qorǵalatyn ashyq ári ádiletti quqyqtyq júıeni qalyptastyrýǵa yqpal etedi.
– Qazaqstanda bıznes bastaýdy josparlaǵan kez kelgen ınvestor eldegi zań ústemdigine jáne turaqty quqyqtyq ortaǵa senimdi bolýy kerek. Ashyqtyq, eseptilik jáne zań ústemdigi – ekonomıkalyq damýdyń negizgi faktorlary. Qazaqstan konstıtýtsııalyq referendým arqyly osy qaǵıdattardy nyǵaıtty, – dedi ol.
Sarapshynyń pikirinshe, konstıtýtsııalyq reformalar Qazaqstannyń halyqaralyq arenadaǵy ashyqtyǵyn kórsetip, ınvestıtsııa tartýǵa jáne saýda-ekonomıkalyq yntymaqtastyqty damytýǵa jańa múmkindikter ashady.
Ralf Vınnı Qazaqstannyń bir palataly parlament júıesine kóshýin de joǵary baǵalady.
– Bul azamattardyń ókildigin arttyryp, Qazaqstannyń ashyqtyq pen transparenttilik baǵytyndaǵy ilgerileýine serpin beredi. Jańa Konstıtýtsııa halyqtyń el bolashaǵyna qatysty sheshimderge yqpal etý múmkindigin arttyrady, – dedi ol.
Al Second Floor Strategies konsaltıngtik kompanııasynyń prezıdenti Ýaılder Alehandro Sanches jańa Konstıtýtsııada vıtse-prezıdent laýazymynyń engizilýin oń ózgeristerdiń biri dep atap ótti.
– Menińshe, jańa Konstıtýtsııadaǵy mańyzdy ózgeristerdiń biri – vıtse-prezıdent qyzmetiniń engizilýi. Bul Qazaqstannyń halyqaralyq baılanystaryn damytýǵa, onyń ishinde Vashıngtonmen saıası dıalogty nyǵaıtýǵa qosymsha múmkindik beredi, – dedi ol.
Sarapshy Qazaqstannyń joǵary deńgeıdegi delegatsııalarymen birneshe ret kezdesýler ótkizgenin aıtyp, jańa laýazymnyń paıda bolýy saıası baılanystardy keńeıtip, ózara resmı saparlardy jıiletý arqyly ekijaqty qarym-qatynastyń damýyna jańa serpin beretinin jetkizdi.
Halyq keńesi týraly sóz qozǵaǵan Ýaılder Alehandro Sanches bul qurylymnyń qoǵam men memleket arasyndaǵy tıimdi baılanys tetigine aınalý áleýeti bar ekenin aıtty.
– Halyq keńesi Prezıdent pen Quryltaıǵa júzege asyrylyp jatqan bastamalar men jobalardyń tıimdiligi, olardyń halyq ıgiligine qanshalyqty qyzmet etip jatqany týraly aqparat beretin tıimdi tetik bola alady, – dedi sarapshy.
Sonymen qatar sarapshy jańa ınstıtýttyń tabysty jumys isteýi onyń ártúrli pikirler men kózqarastardy qanshalyqty eskeretinine baılanysty ekenin atap ótti.
Sanchestiń aıtýynsha, Qazaqstan jańa konstıtýtsııalyq model arqyly ashyq pikirtalasqa, qoǵamdyq pikirdi eskerýge jáne memlekettik sheshimder qabyldaý kezinde túrli kózqarastardyń eskerilýine jaǵdaı jasaı alatynyn kórsetýi mańyzdy.
Eske sala keteıik, 1 shildeden bastap Qazaqstanda jańa Konstıtýtsııa kúshine endi.
