Konstıtýtsııalyq ózgeristerdi qabyldaý úderisi jańasha sıpat aldy - sarapshy
ASTANA. KAZINFORM – Qazaqstanda memlekettik til – qazaq tili jáne kez kelgen resmı qujattyń túpnusqasy osy tildegi nusqamen esepteledi. Sonymen qatar qazirgi tańda konstıtýtsııalyq ózgerister jobasy qoǵamda qyzý talqylanyp jatyr. Bul úrdis tek kabınet ishinde emes, ǵylymı orta men áleýmettik jelilerde ashyq júrgizilip jatyr.
Bul týraly L.N. Gýmılev atyndaǵy EUÝ prorektory, saıasattanýshy Indıra Rystına Jibek Joly telearnasynyń «Bugin LIVE» baǵdarlamasynda málimdedi.
Sarapshynyń aıtýynsha, qoǵamda til máselesine qatysty túrli pikirtalastar bolǵanymen, Konstıtýtsııada bekitilgen memlekettik tildiń orny bólek. Bul mártebe tildik qoldanystyń barlyq salada tolyqqandy kórinis tabýyn mindetteıdi.
– Bizdiń Konstıtýtsııamyzda memlekettik til – qazaq tili dep bekitilgen. Osyny ajyrata alýymyz kerek. Eger úsh tildegi qujattar arasynda qandaı da bir daý týyndasa, onyń bastapqy ári eń durys nusqasy retinde memlekettik tildegi, ıaǵnı qazaq tilindegi qujat tanylady, – dedi Indıra Rystına.
Indıra Rystına Ata zańǵa engiziletin ózgeristerdiń tek mátini ǵana emes, ony qabyldaý úderisiniń ózi jańasha sıpat alǵanyn atap ótti. Saıası reformalarǵa bastaý bolǵan Joldaýdan keıin arnaıy jumys toby qurylyp, oǵan zańgerler, saıasattanýshylar men qoǵam belsendileri tartylǵan.
Sarapshynyń aıtýynsha, parlamenttik reforma men bir palataly júıege kóshý máselesi kóptegen kezdesýlerde egjeı-tegjeıli talqylandy. Quryltaıda Prezıdent tarapynan jarııalanǵan usynystardy resmı zań tiline kóshirý úshin arnaıy Konstıtýtsııalyq komıssııa jeti márte otyrys ótkizgen.
– Jaqynda Eýrazııa ulttyq ýnıversıtetinde ǵylymı orta men komıssııa ókilderiniń qatysýymen úlken talqylaý ótti. Biz óz usynystarymyzdy daıyndap, komıssııa múshelerine tabystadyq. Mundaı jumys elimizdiń túkpir-túkpirinde júrip jatyr. Halyq óz usynystaryn eGov nemese resmı ótinishter arqyly da jibere alady. Bul – «halyq únine qulaq asatyn memleket» prıntsıpiniń is júzinde qalaı jumys isteıtininiń kórinisi, – dep túıindedi prorektor.
Aıta keteıik, búgin memlekettik basqarý akademııasynda Jańa Konstıtýtsııanyń jobasy talqylanǵanyn jazǵan edik.