Konstıtýtsııalyq ózgerister azamattyq qoǵamnyń rólin kúsheıtedi – Maqsat Tolyqbaı

ASTANA. KAZINFORM – Konstıtýtsııalyq reformalar aıasynda usynylyp otyrǵan ózgeristerdiń basty maqsaty – kúshti tulǵalarǵa emes, myqty ınstıtýttarǵa súıenetin memleket qalyptastyrý. Bul týraly Konstıtýtsııalyq reformalar jónindegi komıssııanyń besinshi otyrysynda Májilis depýtaty, jýrnalıst Maqsat Tolyqbaı málimdedi.

– Jalpy azamattyq qoǵam myqty bolmaı, memleket te myqty bolmaıdy. Qoǵamdaǵy másele mıtıngilerde emes, eń aldymen osyndaı minberlerde ashyq aıtylýy kerek, - dedi Maqsat Tolyqbaı.

Depýtattyń aıtýynsha, Konstıtýtsııada alǵash ret Qazaqstan Halyq keńesi týraly jeke baptyń engizilýi azamattardyń pikirin memlekettik sheshim qabyldaý úderisine júıeli túrde engizilmek. Usynylǵan redaktsııaǵa sáıkes, Halyq keńesi zań jobalaryn engize alady ári respýblıkalyq referendým taǵaıyndaý týraly bastama kóterý quqyǵyna ıe bolady.

Sonymen qatar birpalataly parlamentke kóshý máselesi jan-jaqty taldanyp, Quryltaıdyń ókilettigi men mártebesi naqtylanǵan. Atap aıtqanda, Quryltaıdyń ókilettigi onyń birinshi sessııasy ashylǵan sátten bastalyp, jańadan saılanǵan quram jumysyn bastaǵanǵa deıin jalǵasady. 

Maqsat Tolyqbaı Quryltaıdyń proportsıonaldy júıe boıynsha, birtutas ulttyq saılaý okrýgi negizinde saılanatynyn da atap ótti. Onyń pikirinshe, bul tásil partııalar arasyndaǵy kásibı básekelestikti arttyryp, zań shyǵarý protsesiniń sapasyn kúsheıtedi.

Depýtattyń aıtýynsha, usynylyp otyrǵan konstıtýtsııalyq ózgeristerdiń túpki maqsaty – bılikti shoǵyrlandyrý emes, azamattyq qoǵamnyń rólin kúsheıtetin tıimdi saıası ınstıtýttar qalyptastyrý.

Aıta keteıik, buǵan deıin Ózbekstan sarapshylary Qazaqstandaǵy konstıtýtsııalyq reformalar Ortalyq Azııa úshin de mańyzdy ekenin aıtqan edi.