Konstıtýtsııalyq organ sot júıesine kirmeıdi — Nazgúl Tuıaqbaeva
ASTANA. KAZINFORM — Jańa Konstıtýtsııada Konstıtýtsııalyq sottyń mártebesi alǵash ret aıqyndalyp, ol Konstıtýtsııanyń ústemdigin qamtamasyz etetin táýelsiz memlekettik organ retinde belgilendi.
Bul týraly QR Konstıtýtsııalyq sotynyń analıtıgi Nazgúl Tuıaqbaeva Jibek Joly telearnasynyń «Búgin LIVE» baǵdarlamasynda aıtty.
Onyń aıtýynsha, Konstıtýtsııalyq sottyń negizgi mindeti — Konstıtýtsııanyń ústemdigin qamtamasyz etip, konstıtýtsııalyq baqylaýdy júzege asyrý.
— Jańa Konstıtýtsııanyń normalaryna sáıkes Konstıtýtsııalyq sot Konstıtýtsııanyń ústemdigin qamtamasyz etetin jáne konstıtýtsııalyq baqylaýdy júzege asyratyn táýelsiz memlekettik organ mártebesine ıe boldy, — dedi Nazgúl Tuıaqbaeva.
Spıkerdiń sózinshe, Konstıtýtsııalyq sottyń basqa sottardan basty aıyrmashylyǵy — onyń jalpy sot júıesine kirmeıtininde.
— Konstıtýtsııaǵa sáıkes memlekettik bılik zań shyǵarýshy, atqarýshy jáne sot bıligi bolyp bólinedi. Al Konstıtýtsııalyq sot bul bılik tarmaqtarynyń eshqaısysyna kirmeıtin táýelsiz memlekettik organ bolyp tabylady. Onyń basty mıssııasy — Konstıtýtsııanyń ústemdigin qamtamasyz etý jáne konstıtýtsııalyq baqylaýdy júzege asyrý, — dedi ol.
Nazgúl Tuıaqbaevanyń aıtýynsha, Konstıtýtsııalyq sottyń ókilettigine jańa baǵyt ta engizilgen.
— Konstıtýtsııalyq zańǵa engizilgen ózgeristerge sáıkes Konstıtýtsııalyq sot halyqaralyq uıymdar men olardyń organdary sheshimderiniń Konstıtýtsııaǵa sáıkestigin qaraý ókilettigine ıe boldy, — dedi Nazgúl Tuıaqbaeva.
Aıta keteıik, buǵan deıin jańa Konstıtýtsııa jobasynda Halyq keńesine zańnamalyq bastama kóterý jáne respýblıkalyq referendým ótkizýdi usyný quqyǵy beriletini týraly jazǵanbyz.
