Konstıtýtsııalyq komıssııanyń qurylýyn konstıtýtsııalyq transformatsııaǵa ótý retinde qarastyrǵan jón – Ázimova

ASTANA. KAZINFORM – Konstıtýtsııalyq komıssııanyń aldynda aıryqsha mıssııa tur. Bul týraly Astanada Konstıtýtsııalyq reforma jónindegi komıssııanyń alǵashqy otyrysynda  Konstıtýtsııalyq sot tóraǵasy Elvıra Ázimova málim etti. 

– Konstıtýtsııalyq reforma qoǵamnyń barlyq salasynda keń talqylaýǵa ıe boldy. Ony iske asyrýǵa barlyq saıası partııa, úkimettik emes uıymdar, kásipkerlik qurylymdar, zańgerler men sarapshylar bastamalaryn joldady. Sol sebepti Konstıtýtsııalyq komıssııanyń qurylýyn salalyq ózgeristerden keshendi konstıtýtsııalyq transformatsııaǵa ótý retinde qarastyrǵan jón. Komıssııa quramyna Qazaqstan Respýblıkasy Parlamentiniń depýtattary, máslıhat tóraǵalary, BAQ basshylary, qoǵamdyq belsendiler, memlekettik organdar men óńirlik qoǵamdyq keńesterdiń ókilderi, sondaı-aq saraptamalyq jáne ǵylymı qaýymdastyqtar endi. Bul qoǵamdyq kózqarastardyń, tájirıbe men suranystyń áralýandyǵyn kórsetedi, - dedi E. Ázimova.

Osy oraıda ol Konstıtýtsııalyq komıssııanyń aldynda aıryqsha mıssııa turǵanyn atap ótti. Bir jaǵynan konstıtýtsııalyq qurylystyń irgeli qaǵıdattaryn saqtaı otyryp, ekinshi jaǵynan zamanaýı syn-qaterlerge qatysty óz ustanymymyzdy tolyqqandy aıqyndaýǵa múmkindik beretin Ata zańnyń tıisinshe teńgerimin qamtamasyz etý eskerilgenin aıtty.

– Sizderdiń kásibı tájirıbelerińiz, otansúıgishtik jáne salmaqty ustanymdaryńyz barlyq usynysty jan-jaqty qarastyrýǵa, olardy júıelep qorytýǵa, elimizdiń damýyna qýatty serpin bere alatyn naqty ári saralanǵan ózgerister jobasyn ázirleýge múmkindik beretinine senimdimin, - dedi ol.

Eske sala keteıik, buǵan deıin Elvıra Ázimova Konstıtýtsııalyq komıssııanyń aldynda aıryqsha mıssııa turǵanyn aıtty.