Konstıtýtsııalyq komıssııanyń aldynda aıryqsha mıssııa tur – Elvıra Ázimova
ASTANA. KAZINFORM – Astanada Konstıtýtsııalyq reforma jónindegi komıssııanyń alǵashqy otyrysy bastaldy.
– 2025 jylǵy 8 qyrkúıekte Prezıdent «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty halyqqa Joldaýynda jasandy ıntellekt dáýirinde elimizdiń áleýmettik-ekonomıkalyq damýyna eleýli oń yqpal etetin jańa saıası reformany jarııalady. Memleket basshysy «Kúshti Prezıdent – yqpaldy Parlament – esep beretin Úkimet» tujyrymdamasy negizinde elimizde bir palataly Parlament qurý bastamasyn kóterdi. Ózderińizge belgili, parlamenttik reformany ázirleý jónindegi jumys toby 2025 jylǵy qazan aıynan bastap belsendi jumys atqardy. Onyń quramyna belgili zańgerler men sarapshylar, saıası partııalar jáne qoǵamdyq uıymdardyń ókilderi kirdi. Osy ýaqyt aralyǵynda jumys toby barlyq usynymdy muqııat zerdelep, júıeledi, sondaı-aq azamattardan kelip túsken usynystardy jan-jaqty taldady. Azamattar óz usynystarynda tek bir palataly Parlament máselesin ǵana kótergen joq. Osyǵan oraı, Memleket basshysy Konstıtýtsııalyq reforma jónindegi komıssııa qurý týraly sheshim qabyldady, - dedi Konstıtýtsııalyq sot tóraǵasy Elvıra Ázimova.
Onyń aıtýynsha, qazirgi ýaqytta Jumys tobynyń múshelerinen bólek, azamattardan eki myńnan astam usynys kelip túskenin erekshe atap ótken jón. Keńeıtilgen quramdaǵy Konstıtýtsııalyq komıssııanyń qurylýy osy ýaqytqa deıin atqarylǵan jumystyń qısyndy jalǵasy, sondaı-aq birneshe aıǵa ulasqan pikirtalastar barysynda qalyptasqan aýqymdy qoǵamdyq suranysqa berilgen jaýap boldy.
– Prezıdent usynǵan memlekettik bılikti bir palataly Parlamentke – Quryltaıǵa ótkizý, Halyq keńesin qurý, Vıtse-Prezıdent laýazymyn engizý jáne basqa da máseleler jan-jaqty ári keshendi túrde zerdelep, pysyqtaýdy qajet etedi. Qazaqstan Respýblıkasy saıası jańǵyrýdyń jańa kezeńine qadam basýda. Memleket basshysy ári qaraıǵy damýdyń ınstıtýtsıonaldyq tepe-teńdikti nyǵaıtý, zań shyǵarýshy bıliktiń tıimdiligin arttyrý, tejemelik tepe-teńdik júıesin kúsheıtý, sondaı-aq qoǵamnyń memlekettik basqarýǵa qatysýyn qamtamasyz etetin konstıtýtsııalyq mehanızmderdi jańartý arqyly ǵana múmkin ekenin aıqyn atap kórsetti, - dedi ol