Konstıtýtsııalyq komıssııada memleketke qaýip tóndiretin áreketter naqty talqylandy — depýtat

ASTANA. KAZINFORM — Konstıtýtsııalyq komıssııa memleketke, qoǵamǵa jáne beıbit ómirge qaýip tóndiretin áreketterdi anyq kórsetip jatyr. Bul týraly Konstıtýtsııalyq reformalar jónindegi komıssııanyń (Konstıtýtsııalyq komıssııa) kezekti otyrysynda Májilis depýtaty Maksım Rojın etti. 

— Usynylyp otyrǵan redaktsııada biz mynalardy naqty kórsetemiz. Konstıtýtsııalyq qurylysty kúshtep ózgertýge shaqyrýǵa, Qazaqstan Respýblıkasynyń aýmaqtyq tutastyǵy men egemendigine qol suǵýǵa, qoǵamdyq tártipti buzýǵa, ulttyq qaýipsizdikke nuqsan keltirýge, soǵysty jáne qarýly qaqtyǵystardy nasıhattaýǵa, áleýmettik ári násildik, ulttyq, etnıkalyq jáne dinı artyqshylyqtardy qozdyrýǵa, zorlyq-zombylyq pen qatygezdikti dáripteýge jol berilmeıtini Konstıtýtsııalyq deńgeıde bekitildi. Sonymen qatar, tek osyndaı áreketterdiń ózi ǵana emes, olarǵa arandatýshylyq qyzmet pen úndeýlerge de jol berilmeıtini naqty jazyldy. Bul — óte mańyzdy quqyqtyq naqtylaý. Óıtkeni zańǵa baǵyný tek jazalaý arqyly ǵana emes, eń aldymen, quqyq buzýshylyqtyń aldyn alý arqyly qamtamasyz etiledi, — dedi Maksım Rojın.

Onyń aıtýynsha, Konstıtýtsııalyq komıssııa memleketke, qoǵamǵa jáne beıbit ómirge qaýip tóndiretin áreketterdiń shegin anyq kórsetip jatyr.

— Bul demokratııalyq memlekettik ózin-ózi qorǵaý tetigi. Turaqtylyq men qaýipsizdik kez kelgen quqyq pen bostandyqtyń irgetasy. Sondyqtan bul túzetýlerdi erkindikti shekteý dep emes, erkin qoǵamnyń negizin qorǵaý dep qabyldaýymyz kerek, — dedi depýtat.

Buǵan deıin habarlanǵandaı, Konstıtýtsııalyq reformalar jónindegi komıssııanyń (Konstıtýtsııalyq komıssııa) kezekti otyrysynda Májilis depýtaty Sergeı Ponomarev Halyq keńesiniń quramy men ókilettigi týraly aıtty.