Konstıtýtsııalyq komıssııa jumysy áli aıaqtalǵan joq — jobaǵa ózgerister ene me
ASTANA. KAZINFORM — Parlament Senatynyń depýtaty, Konstıtýtsııalyq komıssııa múshesi Nurlan Beknazarov Jibek Joly telearnasyna bergen suhbatynda bir palataly Parlament qurylymy úlken zańnamalyq retteýdi talap etetinin aıtty.
Onyń aıtýynsha, Konstıtýtsııalyq reformalar jónindegi komıssııa áli jumysyn jalǵastyrýda jáne taǵy da otyrystar josparlanǵan. Onda árbir talap pen árbir usynys talqylanady.
— Komıssııanyń basty jumysy — kelip túsken árbir usynysty baıyppen zerdelep, tolyqqandy qarap, ashyq túrde talqylaý boldy. Osy kúnge deıin ótken otyrystardy halyq ashyq kórip otyrdy. Bul buryn-sońdy bolmaǵan aqparattandyrý boldy jáne óz jemisin berdi — óńirlerde azamattar qyzyǵýshylyq tanytyp, belsendi bola bastady. Ázirge bizge 2 myńnan astam usynys kelip tústi jáne áli de kelip jatyr. Komıssııa óz jumysyn áli aıaqtaǵan joq. Menińshe sońǵy núktesi qoıylǵansha usynystar qaralyp, kópshilik talqysyna salynady. Sebebi eshnárse nazardan tys qalmaýy kerek. Bizge jeke habarlasqan turǵyndar da bar. Olardyń da usynystaryn túrtip alyp, komıssııa ishindegi toptarda talqylap jatyrmyz, — dedi Senat depýtaty.
Sonymen birge, N. Beknazarov Ata Zańǵa ózgerister engizý barysynda naqty qandaı elderdiń tájirıbesi qarastyrylǵanyn aıtyp berdi.
— Bir palataly Parlament qurylymy úlken zańnamalyq retteýdi talap etedi. Degenmen komıssııa músheleri arasynda Parlament depýtattary, zańgerler jáne basqa da bilikti mamandar bar. Olardyń bastamasymen kelgen usynystardyń negizgi sulbasy óz ishimizde qalyptasty. Árıne, Eýropa elderiniń parlamentarızmi bizdegiden buryn paıda bolyp, damydy. Sol sebepti Shvetsııa, Nıderland, Shveıtsarııa, Italııa jáne túrkitildes elderdiń Parlament qurý protsesi, saılaý protsesi qaraldy, — deıdi N. Beknazarov.
Jańa Quryltaı bir palataly parlament retinde tek qana partııalyq tizimmen proportsıonaldy negizde saılanady. Sol júıeniń ozyq tájirıbesi bar elderdiń qyzmetteri men zań baptary da qaralǵan.
Buǵan deıin Ulytaý oblysy Advokattar alqasynyń advokaty, Respýblıkalyq advokattar alqasy tóralqasynyń múshesi Gaýhar Aıtjanova Jańa Konstıtýtsııada adam quqyǵyn qorǵaýǵa qatysty qandaı ózgeris baryn aıtqan edi.