Konstıtýtsııalyq komıssııa otyrysynda volonterlikke qatysty tyń usynys jasaldy

ASTANA. KAZINFORM — Volonterlikti yntalandyrý normasyn engizý kerek. Bul týraly Konstıtýtsııalyq reforma jónindegi komıssııanyń otyrysynda Májilis depýtaty Vera Kım málim etti.

- Prezıdent volonterler elimizdiń áleýmettik turaqtylyǵynyń mańyzdy tiregi ekenin birneshe ret atap ótti. Konstıtýtsııanyń jańa jobasyna usynystardy qabyldaý jarııalanǵannan beri volonterlik uıymdar men volonterlerdiń ózderinen ótinishter kelip jatyr. Osy oraıda 31-baptyń 2-tarmaǵyna «volonterlik» sózin engizý usynysy boldy. Osyǵan baılanysty Qazaqstan Respýblıkasynda áleýmettik qamsyzdandyrý men qaıyrymdylyq jasaýdy qoldaýmen qatar, volonterlikti de yntalandyrýdy bekitýdi usynamyz, - dedi Vera Kım.

Osy oraıda ol volonterlerdiń qyzmeti óte mańyzdy ekenin, olar tótenshe jaǵdaılarda, aýrýhanalarda, áleýmettik salada kómektesetinin eske saldy.

- Men bul bastamany búkil eriktiler qozǵalysynyń atynan kóterip otyrmyn. Júrgizilgen saýalnamalarǵa sáıkes, búginde árbir segizinshi adamda volonterlik tájirıbe bar, - dedi depýtat.

Aıta keteıik, jaqynda Memleket basshysy Qasym-Jomart Toqaev eriktilerge arnalǵan «Meıirim» ordenin taǵaıyndaý týraly sheshim qabyldaǵanyn habarlady.