Konstıtýtsııalyq komıssııa otyrysynda qandaı usynystar aıtyldy – Maksım Rojınmen suhbat
ASTANA. KAZINFORM – Jibek Joly telearnasy konstıtýtsııalyq reformalardy talqylaýdy jalǵastyrady. Stýdııanyń kezekti qonaǵy, Májilis depýtaty, Konstıtýtsııalyq komıssııa múshesi Maksım Rojın otyrystarda qandaı ózekti suraqtar men usynystar talqylanyp jatqanyn aıtyp berdi.
Depýtattyń aıtýynsha, búgingi kúnge deıin el azamattarynan Konstıtýtsııalyq reformalar boıynsha 4 myńnan astam usynys kelip túsken.
– Kelip jatqan usynystardyń kópshiligi áleýmettik jaǵdaıǵa qatysty – bilim alý, medıtsına, eldegi jalpy áleýmettik ádilet jóninde azamattar kóp júgingen. Jergilikti ınfraqurylym, jergilikti ózin-ózi basqarý nemese memlekettik basqarý tetikterine de qatysty kóp usynys bar. Aldaǵy ýaqytta biz ár azamattyń ótinishterin salystyrmaly kestege shyǵaryp, ár ótinish boıynsha jumys isteıtin bolamyz. ıAǵnı tórt myńnan astam usynys tússe, onyń keıbiri nazardan tys qalady degen oı bolmaýy kerek. Óıtkeni ár usynyspen jumys toptary jeke-dara aınalysatyn bolady, - dedi Maksım Rojın.
Depýtattyń ózi de Konstıtýtsııalyq komıssııa otyrystarynda jumysshy mamandardyń quqyqtaryna qatysty bastamalar kótergen. Óıtkeni bir sanattaǵy azamattarǵa jergilikti atqarýshy bılik birdeı jaǵdaı jasaı almaı otyr.
– Azamattardyń barlyq usynysy qamtylmaıynsha, komıssııa óz jumysyn aıaqtamaıdy. Óıtkeni Prezıdenttiń tikeleı tapsyrmasy bar. Ekinshiden, komıssııanyń jumysy tikeleı efırdegi úsh saǵattyq otyryspen bitip qalmaıdy. Qazirdiń ózinde komıssııa jabyq jumys toptary arasynda saraptamalyq jumystar júrgizip jatyr, - dedi M. Rojın.
Sonymen birge, Konstıtýtsııalyq komıssııa múshesi Halyq Keńesiniń mártebesin kúsheıtýdi, Keńeske zań, ishki saıasat, referendým ótkizý boıynsha usynys jasaý múmkindigin berýdi usynǵanyn eske saldy.
– Biz jyldar boıy elimizde delıveratıvti demokratııa ádisimen, ıaǵnı kópshiliktiń talqylaýy nátıjesinde shyqqan sheshimderge negizdep, úlken ózgerister jasaý úshin jumys istep keldik. Onyń jaqsy mysaly Ulttyq keńes boldy. Ulttyq keńes arqyly azamattardyń usynysymen eldegi biraz qordalanyp qalǵan máseleler sheshilgen bolatyn. Biraz másele zańǵa ulasty. Odan keıin Ulttyq keńes Quryltaı atty konsýltatıvti keńesshi organǵa ulasty. Quryltaı alańynda da turǵyndardyń bastamasymen 26-ǵa jýyq zań qabyldandy. Onyń 10-y qazir Parlamentte qaralyp jatyr. Osy eki konsýltatıvti keńesshi ınstıtýttyń tájirıbesin alyp, oǵan álemdik tájirıbeni qosyp, Halyq keńesin qurý kózdelip otyr, - dedi Maksım Rojın.
Aıta keteıik, Konstıtýtsııalyq komıssııanyń kelesi otyrysy 9 aqpanda ótedi.