Konstıtýtsııalyq komıssııa múshesi: Jańa Konstıtýtsııa máselesin qaraý oryndy

ASTANA. KAZINFORM – Konstıtýtsııalyq reforma jónindegi komıssııanyń búgingi otyrysynda Respýblıkalyq advokattar alqasynyń tóraǵasy Mádı Myrzaǵaraev komıssııa aıasynda jańa Konstıtýtsııa máselesin qaraýdy usyndy.

– Keıingi eki kún ishinde biz usynylyp otyrǵan ózgeristerdi jan-jaqty ári muqııat talqyladyq. Keshe jobanyń aldyn ala nusqasy tanystyryldy. Men bul ózgeristerdiń bárin tereńnen zerdelep shyqtym. Mundaı Konstıtýtsııanyń mazmundyq tujyrymdamasyn ózgertýge baǵyttalǵan ózge de mańyzdy jańalyqtar az emes, - dedi ol.

Mádı Myrzaǵaraev usynylyp otyrǵan ózgeristerdiń bári qoǵamnyń búgingi suranysyna, zaman talabyna saı keletinin atap ótti.

– Osyǵan baılanysty Konstıtýtsııalyq komıssııa aıasynda jańa Konstıtýtsııa máselesin qaraý oryndy dep sanaımyn. Sóz sońynda bul ózgerister boıynsha túpkilikti sheshimdi Qazaqstan halqy qabyldaıtynyn taǵy bir márte atap ótkim keledi. Bul ózgeristerdiń taǵdyryn referendým aıqyndaıdy. Búgingi bizdiń mindetimiz – qoǵamǵa aıqyn ári adamǵa baǵyttalǵan Konstıtýtsııalyq sheshimderdi usyný. Odan arǵysy halqymyzdyń qolynda, - dedi ol.

Eske salaıyq, Konstıtýtsııalyq komıssııanyń V otyrysyn Kazinform agenttiginiń resýrstarynan kórýge bolady. 

Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.