Konstıtýtsııalyq komıssııa Memleket basshysyna jańa Konstıtýtsııanyń qorytyndy jobasyn usyndy
ASTANA. KAZINFORM – Qasym-Jomart Toqaev Konstıtýtsııalyq komıssııa tóraǵasy – Konstıtýtsııalyq sot tóraǵasy Elvıra Ázimovany, Konstıtýtsııalyq komıssııa tóraǵasynyń orynbasary – Memlekettik keńesshi Erlan Qarındi jáne Konstıtýtsııalyq komıssııa múshesi – Prezıdenttiń quqyqtyq máseleler jónindegi kómekshisi Erjan Jıenbaevty qabyldady.
Bul týraly Aqordanyń baspasóz qyzmeti habarlady.
Memleket basshysyna Komıssııanyń jańa Konstıtýtsııa jobasy boıynsha atqarǵan jumysy týraly málimet berildi.
Elvıra Ázimova Komıssııanyń osyǵan deıin ótken on eki otyrysynyń nátıjesinde jańa Ata Zańnyń qorytyndy jobasy ázirlengenin baıandady. Jańa Konstıtýtsııa mátini azamattar men sarapshylardyń byltyr qazan aıynan bastap eGov jáne e-Otinish portaldaryna joldaǵan bastamalary negizinde daıyndaldy. Sondaı-aq jobada Parlamenttik reforma jónindegi jumys toby qazan-qańtar aılary aralyǵynda jınaqtaǵan tásilder de eskerildi. Elvıra Ázimova Konstıtýtsııalyq komıssııa talqylaý qorytyndysy boıynsha jańa Konstıtýtsııa jobasyn jalpyhalyqtyq referendýmǵa shyǵarýdy usynatynyn jetkizdi.
Memleket basshysy Konstıtýtsııalyq komıssııanyń óte aýqymdy ári mańyzdy jumys atqarǵanyn atap ótti. Prezıdenttiń pikirinshe, jańa Konstıtýtsııa erejeleri memleketimizdiń ınstıtýtsıonaldyq negizin transformatsııalaý úderisi tolyǵymen aıaqtalyp, múlde jańa konstıtýtsııalyq úlgige kóshetinin kórsetedi.
Qasym-Jomart Toqaev jańa Ata Zań jobasy qoǵamdaǵy ózekti qundylyqtar men memlekettik saıasat qaǵıdattaryn aıqyndap qana qoımaı, Qazaqstannyń odan ári progressıvti damýyna negiz qalaıtynyn aıtty.
Prezıdent mańyzdy jumysty kásibı turǵyda atqarǵan Konstıtýtsııalyq komıssııa múshelerine rızashylyǵyn bildirdi. Sondaı-aq Komıssııa músheleriniń jańa Konstıtýtsııa jobasyn tikeleı efırde talqylaýy qoǵamdyq dıalogtiń joǵary deńgeıin tanytqanyna nazar aýdardy.
Budan bólek, Memleket basshysy jobany ázirleý men talqylaýǵa myńdaǵan azamattyń belsene atsalysqanyna toqtalyp, bul «Halyq únine qulaq asatyn memleket» tujyrymdamasyna saı keletinin jáne jańa Konstıtýtsııanyń shynaıy halyqtyq sıpatyn kórsetetinin atap ótti.
Qasym-Jomart Toqaev taıaý arada jańa Konstıtýtsııany qabyldaý boıynsha respýblıkalyq referendým ótkizý týraly Jarlyqqa qol qoıatynyn málimdedi.
Osyǵan deıin Májilis depýtaty Aıdos Sarym Konstıtýtsııa jobasyn referendýmǵa shyǵarý úshin Prezıdent qaraýyna usynýǵa bolatyny týraly aıtqan bolatyn.