Konstıtýtsııalyq komıssııa quramynda shetel mamandary joq – Prezıdent

ASTANA. KAZINFORM – Konstıtýtsııalyq reformaǵa baılanysty azamattarmen baılanys jelileri tıimdi jumys istedi. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev málim etti.

- Bárińizge málim, Qazaqstan ótpeli kezeńge aıaq basty. Biz el taǵdyryna áser etetin aýqymdy ózgeristerdi júzege asyryp jatyrmyz. Qyzylordada ótken Ulttyq quryltaı otyrysynda konstıtýtsııalyq reformanyń mańyzdy tustary týraly aıtqanymdy bilesizder. Qoǵamda keshe ǵana emes, jarty jyldan beri Konstıtýtsııaǵa qatysty jan-jaqty pikir almasý júrip jatyr. Barlyq usynysty júıelep, saralaý úshin 130 adamnan turatyn Konstıtýtsııalyq komıssııa quryldy. Bul – aýqymy jaǵynan da, kásibı deńgeıi turǵysynan alyp qarasaq ta, elimiz úshin teńdesi joq komıssııa. Osy joly Komıssııa quramynda shetel mamandary joq, - dedi Qasym-Jomart Toqaev.

Bul turǵyda Prezıdent byltyr qazan aıynan bastap azamattarǵa óz pikirin bildirýge tolyq múmkindik berilgenin eske saldy.Sol ýaqyttan beri eGov jáne eOtinish memlekettik tsıfrlyq platformalary arqyly birneshe myń usynys kelip tústi.

- Komıssııa ótinishtiń bárin muqııat qarap, qorytyp, tıisti túzetýlerdi ázirledi. Konstıtýtsııalyq komıssııanyń jumysy barynsha ashyq júrgizildi. Muny aıtyp ótý mańyzdy. Sebebi elimizdegi reformalar buryn-sońdy eshqashan dál osylaı jan-jaqty talqylanyp, tikeleı efır arqyly jurtshylyqtyń nazaryna usynylmaǵan. Biz «Halyq únine qulaq asatyn memleket» retinde tsıfrlyq platformalardy keńinen qoldandyq. Konstıtýtsııalyq reformaǵa baılanysty azamattarmen baılanys jelileri tıimdi jumys istedi. Sonyń arqasynda shyn máninde jalpyulttyq aýqymdaǵy talqylaý boldy desek, durys bolar. Bul – Ádiletti Qazaqstan qurylysynyń aıqyn kórinisi, - dedi Memleket basshysy.

Aıta keteıik, osy ýaqytta Úkimettiń keńeıtilgen otyrysy ótip jatyr.