Konstıtýtsııalyq komıssııa bıliktiń jańa júıesiniń sulbasyn aıqyndaıdy - sarapshy

ASTANA. KAZINFORM — Memleket basshysy usynǵan reformalar is júzinde jańa Konstıtýtsııanyń qabyldanýyna alyp kelýi múmkin. Mundaı pikirdi saıasattanýshy Azamat Baıǵalıev bildirdi.

Saıasattanýshynyń paıymynsha, jarııa keńistikte «tarıhı» termıni óte jıi qoldanylady. Alaıda, bul jaǵdaıda ol shynymen de qısyndy.

- Prezıdent Qasym-Jomart Toqaev saıası, áleýmettik jáne basqarýshylyq baǵyttarda úlken tolqyn týdyratyn aýqymdy tarıhı reformalardy usyndy, - dep atap ótedi sarapshy.

Degenmen, sarapshy barynsha eń kóp talqyǵa túsetin bastama retinde vıtse-prezıdent ınstıtýtynyń qaıta belgilený múmkindigin atady. Bul laýazym 1996 jylǵa deıin Qazaqstannnyń saıası júıesinde boldy. Al joıylǵannan keıin onyń qyzmeti Memlekettik hatshy, al odan keıin Memlekettik keńesshige bólingenin aıtady. Sarapshynyń baǵalaýynsha, jańa konfıgýratsııada vıtse-prezıdent ókilettigi barynsha keń bolmaq.

- Ulttyq quryltaı otyrysynda jarııa etilgen málimdemege qaraǵanda, vıtse-prezıdenttiń jaýapkershilik aıasy halyqaralyq ókildiktermen, Quryltaı dep atalýy bek múmkin jańa Parlamentpen ózara is-qımyldy, sonymen qatar ishki trektegi jumysty qamtıdy, - dep atap ótedi ol.

Azamat Baıǵalıevtiń paıymynsha, kúrdeli álemdik konıýktýra jaǵdaıynda mańyzdy saıası ókildikterdiń bir bóligin vıtse-prezıdentke tabystaý týraly sheshim memlekettik basqarýdyń jedeldigi men tıimdiligin arttyrýǵa baǵyttalǵan.

- Bul bılik ıerarhııasyna yqpal eteri sózsiz. Biraq, onyń jańa konfıgýratsııadaǵy turaqtylyǵy kúmán týdyrmaıdy, - dedi saıasattanýshy.

Saıasattanýshy Quryltaıdyń bolashaqtaǵy qyzmeti jaıynda aıta kele onyń Senat pen Májilistiń negizgi ókilettikterin biriktirýi múmkin ekenine toqtaldy. Bul rette óńirler men etnıkalyq toptar úshin ókildik qyzmetiniń bir bóligi jańa qurylym – Halyq keńesine beriledi. Keńes jan-jaqty reformalarǵa muqtaj bolǵan Qazaqstan halqy Assambleıasy men Ulttyq quryltaı fýntsııalaryn da ózine alady.

- Bıliktiń joǵary shoǵyryndaǵy ókildik kókjıeginiń keńeıýi saılaýshylardyń eldiń basqarý júıesine senimin arttyrýǵa septigin tıgizýi tıis, - dedi Azamat Baıǵalıev.

Buǵan qosa, saıasattanýshy bıliktiń jańa júıesiniń túpkilikti sulbasy Konstıtýtsııalyq komıssııa jumysy aıaqtalǵannan keıin ǵana túsinikti bolatyndyǵyn atap ótedi.

Buǵan deıin Kazinform analıtıkalyq sholýshysy Prezıdenttiń Parlamentti reformalaý týraly ustanymyn jáne Konstıtýtsııadaǵy yqtımal ózgerister qalaı júzege asatynyn saraptaǵan edi.