Konstıtýtsııalyq komıssııa: Ata zań jobasynda qazaq tili memlekettik til retinde aıqyn kórinis tapqan

ASTANA. KAZINFORM — Prezıdent janyndaǵy Qazaqstannyń strategııalyq zertteýler ınstıtýtynyń dırektory Jandos Shaımardanov Konstıtýtsııalyq reforma jónindegi komıssııanyń búgingi otyrysynda Ata zańdaǵy memlekettik tildiń mártebesi týraly pikirtalastarǵa pikir bildirdi.

— Sondaı-aq, birqatar azamat memlekettik til mártebesine qatysty máselege nazar aýdardy. Biraq bul jerde jańa Konstıtýtsııa jobasynda qazaq tili memlekettik til retinde aıqyn kórinis tapqanyn da aıta ketý kerek, — dedi Jandos Shaımardanov. 

Aıta ketý kerek, ótken apta aıaǵynda jarııalanǵan jańa Konstıtýtsııanyń jobasynda memlekettik tildiń mártebesi týraly norma 9-bapta ornalasqan. Ol jerde memlekettik til — qazaq tili ekeni, al memlekettik mekemeler men ózin-ózi basqarý uıymdarynda orys tili memlekettik tilmen qatar qoldanylatyny aıtylǵan. 

Budan buryn Qazaqstan Respýblıkasy jańa Konstıtýtsııasynyń jobasyna qatysty faktilerdi ádeıi burmalaý jáne jalǵan málimetter taratý jaǵdaılary tirkelip jatqanyn jazǵan edik. ІІM jalǵan aqparat taratqandar jaýapqa tartylǵanyn málim etti.