Konstıtýtsııaǵa ózgeris engizý kerek bolsa, tek referendým arqyly jasaýǵa bolady - Prezıdent

ASTANA. KAZINFORM – Prezıdent Volonterler forýmynda eger bolashaqta Konstıtýtsııaǵa qandaı da bir ózgerister, tipti, shaǵyn ózgerister engizý kerek bolyp jatsa, ondaı qadamdy tek referendým arqyly ǵana jasaýǵa bolady degen oıda ekenin aıtty.

– Konstıtýtsııa, bul – kez kelgen eldiń eń basty jol kórsetetin qujaty, temirqazyǵy. Konstıtýtsııany bárimiz bilýimiz kerek, baǵalaýymyz qajet. Sondyqtan eger bolashaqta Konstıtýtsııaǵa qandaı da bir ózgerister, tipti, shaǵyn ózgerister engizý kerek bolyp jatsa, ondaı qadamdy tek referendým arqyly ǵana jasaýǵa bolady degen oıdamyn. Bul da halqymyzdyń azamattyq quqyǵyn kúsheıtýdiń mańyzdy tásili dep senemin. Taǵy bir aıta ketetin mańyzdy jaıt: Komıssııa Konstıtýtsııaǵa qatysty usynystyń bárin muqııat saralap shyqty. Muqııat oılastyrylǵan túzetýler Konstıtýtsııanyń barlyq negizgi bólimderi men baptaryn, preambýlasyn túgel qamtıtyn bolady, - dedi Prezıdent.

Memleket basshysy qoldanystaǵy Ata Zań Qazaqstannyń táýelsiz memleket retinde damýyna eleýli úles qosqanyn aıtty. Muny eshkim joqqa shyǵarmaıtynyn atap ótti.

– Keshegi otyrystaǵy pikirtalasta Komıssııa músheleri «Ata Zańǵa engiziletin ózgerister aýqymyna qarasaq, jańa Konstıtýtsııa qabyldaýymyz kerek» degen baılam jasady. Shyn máninde, usynylǵan túzetýler jobasy eldi ınstıtýtsıonaldyq-quqyqtyq turǵyda jańǵyrtýmen ǵana shektelmeıdi. Sonymen birge bul qadam tutas memlekettik júıeni qaıta túzýge jol ashady. Túbirimen ózgergen múldem jańa qujattyń beınesi qalyptasty. Ata Zańymyzda jarqyn bolashaqqa nyq qadam basqan búgingi Qazaqstannyń tuǵyry ábden bekigen memleket retindegi ıdealdary, qaǵıdattary men basymdyqtary kórinis tabady. Árıne, qoldanystaǵy Ata Zań Qazaqstannyń táýelsiz memleket retinde damýyna eleýli úles qosty. Muny eshkim joqqa shyǵarmaıdy. Sondyqtan byltyrǵy 30 tamyzda Konstıtýtsııanyń 30 jyldyǵyn keńinen atap óttik, - dedi Memleket basshysy.

Qazaqstanda eriktilerge arnalǵan «Meıirim» ordeni paıda boldy.