Konstıtýtsııaǵa Quryltaı depýtattary mınıstrlerdi laýazymynan bosatatyn norma engizilýi múmkin

ASTANA. KAZINFORM – Senat depýtaty Nurlan Beknazarov Konstıtýtsııalyq reforma jónindegi komıssııanyń ekinshi otyrysynda Quryltaıdyń Úkimet jumysyna yqpaly týraly norma engizý usynylǵanyn aıtty.

- Úkimet pen Joǵary aýdıtorlyq palatanyń Bıýdjettiń atqarylýy týraly esebin talqylaý, bekitý Quryltaı quzyretinde bolady. Quryltaıdyń bul esepti bekitpeýi Úkimetke senimsizdik bildiretinin kórsetedi, - dedi ol.

Quryltaı depýtattary kópshilik daýyspen mınıstrlerdiń taǵdyryna áser etýi múmkin.

- Quryltaı depýtattarynyń jalpy sanynyń keminde úshten biriniń bastamasymen QR Úkimeti músheleriniń óz qyzmeti máseleleri jónindegi esebin tyńdaýy, respýblıka zańdary oryndalmaǵan jaǵdaıda esepti tyńdaýdyń qorytyndysy boıynsha QR Prezıdentine Úkimet múshesin laýazymynan bosatý týraly málimdeme qabyldaý quqyqtary tıisti jekelegen normada naqtylandy. Mundaı jaǵdaıda QR Prezıdenti Úkimet múshesin laýazymynan bosatady, - dedi senator.

Aıta ketý kerek, bul aıtylyp otyrǵan normalardyń bári ázirge usynys qana. Normalardyń qaısysy qabyldanyp, qaısysy Ata zańǵa enbeıtinin referendým sheshedi.

Dál qazir Konstıtýtsııalyq reforma jónindegi komıssııanyń ekinshi otyrysy ótip jatyr.

Kazinform agenttiginiń qazaq jáne orys tilindegi Telegram arnasynda mátin translıatsııasy bolady.

Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.