Konstıtýtsııaǵa qylmystyq protseste prokýror men advokattyń mártebesin teń etetin norma engiziledi

ASTANA. KAZINFORM — Konstıtýtsııalyq reforma jónindegi komıssııanyń búgingi otyrysynda Respýblıkalyq advokattar alqasynyń tóraǵasy Mádı Myrzaǵaraev Ata zańǵa advokattardyń mártebesin nyǵaıtatyn normalardyń enetinin erekshe qýanyshty jańalyq dep sıpattady.

 — Men úshin erekshe mańyzdy ári qýanyshty jaıt — advokatty Konstıtýtsııa deńgeıinde qylmystyq protseste prokýrormen teń dárejedegi tarap retinde bekitý týraly usynystyń qoldaý tabýy. Jobaǵa alǵash ret advokattardyń quqyqtyq mártebesine arnalǵan arnaıy bap engizilip otyr. Bul bizge protsestiń ózge qatysýshylarymen teń jaǵdaıda azamattyń quqyqtaryn qorǵaýǵa naqty múmkindik beredi, — dedi Mádı Myrzaǵaraev.

Onyń paıymdaýynsha, ózgertýler jobasyna engizilgen jańa normalar qoǵamnyń kútken suranystaryna saı keledi.

— Sebebi olar adamnyń engizgi quqyqtaryna tikeleı qatysty. Atap aıtqanda, «jaýapkershilikti kúsheıtetin zańnyń keri kúshi bolýy múmkin be» degen másele, sot sheshiminsiz ustaýǵa jol bermeý kepildikteri, quqyq qorǵaý organdarynyń ustalǵan azamatqa sol sáttiń ózinde onyń quqyqtaryn túsindirý mindeti sekildi túıindi suraqtar qamtylǵan, — dedi Respýblıkalyq advokattar alqasynyń tóraǵasy.

Eske salaıyq, Konstıtýtsııalyq komıssııanyń V otyrysyn Kazinform agenttiginiń resýrstarynan kórýge bolady. 

Ótken aptada Konstıtýtsııalyq komıssııanyń alǵashqy otyrysy ótip, bir palataly «Quryltaıdyń» fýnktsııasy men quramy, vıtse-prezıdent laýazymynyń memlekettik bıliktegi orny, zań shyǵarý bastamasyn kóterýge haqyly «Halyq keńesiniń» quzyreti qandaı bolatyny aıtylǵan edi.