Konstıtýtsııadan Úkimettiń keıbir ókilettikteri alynyp tastalady

ASTANA. KAZINFORM – Konstıtýtsııadan Úkimettiń keıbir ókilettikteri alynyp tastalady. Bul týraly Konstıtýtsııalyq reformalar jónindegi komıssııanyń ekinshi otyrysynda Ádilet mınıstri Erlan Sársembaev aıtty.

- Konstıýtsııanyń 5-bólimindegi Úkimettiń fýnktsııalaryn aıqyndaıtyn tıisti bapta memlekettik baǵdarlamalardy bekitýge, sondaı-aq memlekettik komıtetterge qatysty ókilettikterdi, atap aıtqanda olardyń qyzmetine basshylyq jasaý jáne aktilerdiń qoldanylýyn joıý nemese toqtata turý ókilettikterin alyp tastaý usynylady, - dedi Erlan Sársembaev.

Onyń atap ótýinshe, memlekettik josparlaýdyń jańa júıesine sáıkes, memlekettik baǵdarlamalar bul júıeniń qujattary bolyp tabylmaıdy.

- Mundaı baǵdarlamalar qajettigine qaraı ázirlenip, bekitiletin bolady. Qazirgi ýaqytta atqarýshy bılik qurylymyndaǵy komıtetter ortalyq atqarýshy organnyń vedomstvosy bolyp sanalady. Osyǵan baılanysty olardy Konstıtýtsııada jeke atap ótýdiń oryndylyǵy joq,- dedi mınıstr.

Buǵan deıin Senat depýtaty Nurlan Beknazarov Konstıtýtsııalyq reforma jónindegi komıssııanyń ekinshi otyrysynda zań shyǵarý bastamasy bar organdar sany artatynyn aıtty.