Konstıtýtsııadan «Astana» qarjy ortalyǵyna qatysty norma joıylýy múmkin

ASTANA. KAZINFORM – Búgin Konstıtýtsııalyq reformalar jónindegi komıssııanyń otyrysynda Ádilet mınıstri Erlan Sársembaev qolanystaǵy Ata zańnan «Astana» halyqaralyq qarjy ortalyǵyna qatysty normany alyp tastaýdy usyndy.

– Konstıtýtsııaǵa engiziletin túzetýler jobasynyń 4-babynyń 6-tarmaǵy eldiń ekonomıkalyq damýyna qatysty máselelerge arnalǵan. Osy maqsatta Respýblıka aýmaǵynyń jekelegen bólikterinde nemese olardyń sheginde arnaıy quqyqtyq rejım engizý múmkindigi kózdelip otyr. Mundaı rejım qarjy salasynda nemese «damý qarqyny ozyq qalasynda» qoldanylýy múmkin, ıaǵnı, birinshi jaǵdaıda 2018 jyldan beri tabysty jumys istep kele jatqan Astana halyqaralyq qarjy ortalyǵy týraly bolsa, ekinshi jaǵdaıda – Alataý qalasy jóninde aıtylyp otyr. Osyǵan baılanysty qarjy ortalyǵyna qatysty normany eldiń Negizgi zańynyń qazirgi redaktsııasynan alyp tastaý usynylady, - dedi mınıstr.

Erlan Sársembaevtyń aıtýynsha, bul tásil memlekettiń ýnıtarlyǵy, onyń aýmaqtyq tutastyǵy týraly qaǵıdattardy saqtaı otyryp, ekonomıkalyq máselelerdi sheshýge jáne ınvestıtsııalyq ahýaldy jaqsartýǵa múmkindik beredi.

– Bul sheshim ornyqty ári boljamdy konstıtýtsııalyq-quqyqtyq negiz qalyptastyrýǵa baǵyttalǵan. Atalǵan máseleni konstıtýtsııalyq zań deńgeıinde naqtylaýǵa bolady, - dedi ol.

Aıta keteıik, Konstıtýtsııaǵa qylmystyq protseste prokýror men advokattyń mártebesin teń etetin norma engizilmek.