Konstıtýtsııadaǵy ekologııalyq normalar memlekettik saıasattyń basym baǵytyn aıqyndady – sarapshy
ASTANA. KAZINFORM – Konstıtýtsııada ekologııalyq qaǵıdattardyń bekitilýi tabıǵatty qorǵaý saıasatynyń mańyzyn arttyryp, qoǵamda ekologııalyq mádenıetti damytýǵa negiz qalaıdy. Bul týraly BIZDIÑ ORTA podkastynda «Halyqaralyq jasyl tehnologııalar jáne ınvestıtsııalyq jobalar ortalyǵy» KEAQ jasyl tehnologııalar departamentiniń dırektory Aıman Esekına málimdedi.
Onyń aıtýynsha, Konstıtýtsııaǵa ekologııalyq normalardyń engizilýi memleket pen azamattardyń qorshaǵan ortaǵa degen jaýapkershiligin arttyrady.
– Meniń oıymsha, ekologııanyń Konstıtýtsııa deńgeıinde bekitilýi bul salaǵa memlekettik saıasat deńgeıinde úlken mán beriletinin kórsetedi. Sebebi Konstıtýtsııa – zańnamalyq ıerarhııanyń negizi, jáne onda kórsetilgen talaptardy barlyǵymyz oryndaýǵa mindettimiz, - dedi Aıman Esekına.
Ol sondaı-aq ekologııalyq normalardy konstıtýtsııalyq deńgeıde bekitý qoǵamda ekologııalyq sanany qalyptastyrýda mańyzdy ról atqaratynyn atap ótti.
– Bul ekologııalyq mádenıetti tárbıeleýge, ekologııalyq sanany qalyptastyrýǵa negiz bolady, - dedi ol.
Sarapshynyń pikirinshe, konstıtýtsııalyq normalardy tıimdi iske asyrý eldegi ekologııalyq jaǵdaıdy jaqsartýǵa yqpal etedi.
– Konstıtýtsııada bekitilgen ekologııalyq norma jaı ǵana formaldylyq emes, naqty baǵdar bolýy tıis. Sonyń arqasynda Qazaqstan kezeń-kezeńimen ekologııalyq mádenıetti nyǵaıtyp, zamanaýı tehnologııalardy engizip, tabıǵatty qorǵaý deńgeıin jańa satyǵa kótere alady, - dep tolyqtyrdy ol.
Aıman Esekına eldiń zańnamalyq júıesindegi ekologııalyq baǵyttyń kúsheıýi Qazaqstanda turaqty ári «jasyl» ekonomıkany damytýdaǵy mańyzdy qadam bolatynyn aıtty.
Eske sala keteıik, Memleket basshysy qorshaǵan ortany qorǵaý salasyndaǵy birqatar halyqaralyq uıym basshylarymen kezdesip, Ortalyq Azııadaǵy negizgi ekologııalyq bastamalardy iske asyrý joldaryn talqylady.
