Konstıtýtsııada joǵary bilimdi memleket qalaı qarjylandyratynyn naqty jazý kerek - rektor
ASTANA. KAZINFORM – E.Bóketov atyndaǵy Qaraǵandy ýnıversıtetiniń rektory Nurlan Dýlatbekov jańa Konstıtýtsııada joǵary bilimge qol jetkizýdiń qaǵıdattary naqty jazylý kerek degen usynys aıtty.
- Konstıtýtsııa jobasynyń 33-babyn talqylaǵan kezde sońǵy 30 jyldaǵy joǵary bilim júıesiniń damý barysyn eskerý mańyzdy dep esepteımin. Máselen, 1995 jyly Konstıtýtsııa qabyldanar kezde joǵary oqý oryndarynyń túgel derligi memlekettik menshikte bolǵany belgili. Al búginniń sharttary basqa. Akademııalyq jáne basqarý avtonomııasy paıda boldy. Jeke jáne halyqaralyq ýnıversıtetter damyp kele jatyr. Qarjylandyrýdyń modeli ózgerdi. Burynǵy tikeleı bıýdjetten qarjylandyrýdyń ornyn memlekettik bilim berý tapsyrysy basqan. Granttar men birlesken qarjylandyrý korporatıvtik baǵdarlamalar men bilim nesıeleri belsendi túrde iske qosylǵan, - dedi ol.
Ǵalym qazir bilim berý júıesi túrli kózden qarjylandyrylatynyn eske saldy.
- Mundaı tásil oqýǵa qol jetkizý joldaryn keńeıtip, baǵdarlamalardyń sapasyn arttyrýǵa, ýnıversıtetti damytýdyń ornyqty modelin qurýǵa múmkindik beredi. Joǵary oqý ornynyń menshik nysanyna qaramastan, joǵary jáne joǵary bilimnen keıingi bilimdi memlekettik bilim berý tapsyrysy arqyly nemese aqyly negizde, konkýrs negizinde, Qazaqstan Respýblıkasy zańnamasynda kórsetilgen sharttar men tártipte alýǵa bolatynyn neǵurlym naqtyraq kórsetetin mátindik tujyrymdardy qoldaný qajet, - dedi Nurlan Dýlatbekov.
Aıta keteıik, jańa Konstıtýtsııanyń jobasyn túrli mekemeler, ujymdar talqylap jatyr.