Konstıtýtsııada jeke bas bostandyǵyna qatysty normalar naqtylanady – Artýr Lastaev
ASTANA. KAZINFORM – Konstıtýtsııalyq reforma jónindegi komıssııanyń VII otyrysynda Qazaqstan Respýblıkasyndaǵy Adam quqyqtary jónindegi ýákil Artýr Lastaev jeke basqa qol suǵylmaýshylyq máselesine qatysty pikir bildirdi.
Onyń aıtýynsha, Konstıtýtsııa jobasyna sáıkes, adamdy qamaýda ustaýǵa tek sottyń sheshimimen ǵana jol beriledi. Al sottan tys qamaýda ustaý merzimderi zańnamada naqty aıqyndalatyn bolady.
- Bul másele boıynsha ártúrli pikirler aıtylyp keledi jáne olar áli de talqylaný ústinde. Qoǵamdyq talqylaý nátıjesinde atalǵan normalar naqtylanýy múmkin ekenin joqqa shyǵarmaımyn, – dedi Artýr Lastaev.
Sondaı-aq ol jańa redaktsııada quqyqtyq sýbektilik, óz quqyqtary men bostandyqtaryn zańdy tásildermen qorǵaý, sonyń ishinde qajetti qorǵaný quqyǵy tolyq kólemde saqtalatynyn atap ótti.
– Qylmystyq qol suǵýshylyqtarǵa belsendi túrde qarsy turý múmkindigi ómir súrý quqyǵyn tolyqtyryp, onyń absolıýtti sıpatyn naqty mazmunmen baıytady. Bul tetik adamnyń ómirinen zańsyz jáne negizsiz aıyrýdyń aldyn alýǵa baǵyttalǵan, ıaǵnı ómir súrý quqyǵyn tek formaldy emes, naqty qorǵaýdy qamtamasyz etedi, – dedi ýákil.
Artýr Lastaev tsıfrlandyrý úderisiniń qarqyndy damýyn eskere otyryp, Konstıtýtsııa jobasynda jeke ómirge qol suǵylmaýshylyqty, zańmen qorǵalatyn qupııany jáne derbes derekterdiń qaýipsizdigin jańa tehnologııalar jaǵdaıynda da kepildendirý kózdelgenin aıtty.
– Qazirgi álemde tsıfrlyq beıberekettiliktiń aldyn alý úshin Konstıtýtsııa deńgeıinde sóz bostandyǵyna qatysty normalardy naqtylaý áldeqashan qajettilikke aınaldy. Aqparattyq keńistik jaǵdaıynda pikir bildirý erkindigi men jarııa sóz úshin jaýapkershilik arasyndaǵy tepe-teńdik aıryqsha mańyzǵa ıe. Mundaı balans ózge tulǵalardyń quqyqtaryn qorǵaý men qoǵamnyń ornyqty damýyn qamtamasyz etý úshin qajet, – dep túıindedi Artýr Lastaev.
Buǵan deıin Konstıtýtsııalyq reforma jónindegi komıssııanyń otyrysynda Memlekettik keńesshi Erlan Qarın qoǵamda aıtylyp jatqan usynysqa qatysty pikir bildirgen edi.