Konstıtýtsııada ulttyq valıýta 2 tilde de «teńge» dep jazylady

ASTANA. KAZINFORM — Quryltaıǵa Konstıtýtsııaǵa sáıkes ózge máseleler boıynsha da zań qabyldaý quqyǵy berilmek. Bul týraly Konstıtýtsııalyq reformalar jónindegi komıssııanyń HІІ otyrysynda Konstıtýtsııalyq sot tóraǵasynyń orynbasary Baqyt Nurmuhanov aıtty.

— Komıssııaǵa keıbir normalardyń tujyrymdamalaryn naqtylaý týraly usynystar kelgen bolatyn. Olardyń keıbireýleri eskerildi.

Mysaly, Preambýlada orys tilinde «ıskonnyı» sózi «ıskonno» dep aýystyryldy — «ıskonno kazahskıı zemle».

Keıbir baptarda «adam quqyqtary men bostandyqtary» degen sózder «adam men azamattyń quqyqtary men bostandyqtar» dep alyndy. Ol Preambýlaǵa, respýblıka qyzmetiniń negiz quraýshy qaǵıdattaryna jáne basqa da tarmaqtarǵa qatysty. Adam men azamat quqyqtary men bostandyqtaryn qorǵaý sot bıligin júzege asyrýdyń maqsaty bolyp anyqtaldy.

2-bapta qos tilde de teńge dep jazyldy.

Elordanyń mártebesi konstıtýtsııalyq zańda aıqyndalady.

Memlekettik organdaryń zańsyz áreketterinen keltirilgen zııandy memleketten ótetý quqyǵy 15-baptan 14-bapqa aýystyryldy, — dedi ol.

Onyń aıtýynsha, keıbir komıssııa músheleri «adam quqyqtary absolıýtti» degen termındi aýystyrý qajettigine nazar aýdarǵan. 

— Sondyqtan 14-baptyń 2-tarmaǵynda bul termın «ajyratýǵa jáne aıyrýǵa bolmaıtyn» quqyq dep ózgertildi.

17-bapta «ómir súrý quqyǵy ári adamnyń ajyratýǵa jáne aıyrýǵa bolmaıtyn quqyǵy» dep alyndy.

12-baptyń 3-tarmaǵy naqtylandy. Oǵan sáıkes, «óziniń týylǵanyna oraı ózge eldiń azamattyǵyn alǵan kámeletke tolmaǵan balaǵa zańda kózdelgen erejeler qoldanylady» dep jazyldy.

23-baptyń 6-tarmaǵynda «arandatý áreketine» degen sózder alynyp tastaldy.

12, 13, 14, 33, 45 jáne 49-baptardyń redaktsııalary naqtylandy.

60-baptyń 3-tarmaǵynda Quryltaı Konstıtýtsııaǵa sáıkes ózge máseleler boıynsha da zań qabyldaıdy dep jazyldy. Alǵashqy nusqada bul qoǵamdyq qatynastar tizbesi jabyq edi. Rásimdik sıpatyn eskere otyryp, zań jobalary boıynsha oqylymdar sanyn Konstıtýtsııalyq zańda belgileý usynyldy, — dedi Baqyt Nurmuhanov.

Buǵan deıin Konstıtýtsııalyq komıssııaǵa jańa Konstıtýtsııa jobasy boıynsha 10 myńnan astam ótinish túskenin jazǵan edik.