Konstıtýtsııada «Táýelsizdik» jáne «Egemendik» sózderin bas árippen jazatyn boldyq — Prezıdent
ASTANA. KAZINFORM — Mazmuny aıryqsha Konstıtýtsııa Ádiletti Qazaqstandy qurý isine zań turǵysynan jol ashty. Bul pikirdi Memleket basshysy Qasym-Jomart Toqaev «Qazaq tili» qoǵamynyń H quryltaıynda aıtty.
Prezıdent «Qazaq tili» qoǵamynyń búgingi quryltaıy shyn máninde tarıhı sátte, ıaǵnı, qasıetti Táýelsizdigimizdiń 35 jyldyǵynyń qarsańynda ótip jatqanyn atap ótti.
Qazaqstan Egemendik jolynyń osyndaı aıtýly mejesine bedeli bıik, bolashaǵy jarqyn el retinde qadam basyp otyr.
— Táýelsizdik týyn kótergeli beri halqymyz kóptegen belesti abyroımen eńserdi. Birtutas ult bolyp, memlekettigimizdiń irgetasyn qalady jáne ony nyǵaıta tústi. Berekeli birligimizdiń arqasynda biz sońǵy jeti jyl ishinde aýqymdy reformalardy tabysty iske asyrdyq. El ómiriniń barlyq salasynda túbegeıli ózgerister jasap, tyń bastamalar kóterdik, — dedi Qasym-Jomart Toqaev.
Eń bastysy, halqymyzdyń temirqazyǵyna aınalǵan qasterli qujat — Konstıtýtsııamyzdy qabyldadyq. Mazmuny aıryqsha Konstıtýtsııa Ádiletti Qazaqstandy qurý isine zań turǵysynan jol ashty.
— Endi Konstıtýtsııaǵa sáıkes elimizdiń Táýelsizdigin, Egemendigin, keń baıtaq jerimizdiń tutastyǵyn, azamattarymyzdyń zańdy quqyqtaryn jáne bostandyqtaryn qorǵaý memleketimizdiń basty, tipti, qasterli mindeti sanalatyn boldy dep aıtsaq, qate bolmas. Barshamyzǵa Táýelsizdik — bárinen qymbat asyl dúnıe. Táýelsizdik bolmasa, bizdiń halqymyzdyń keleshegi tyǵyryqqa tireletini anyq. Sondyqtan Táýelsizdikti qorǵaý ári nyǵaıtý — eń qasıetti borysh, eń qasterli paryz, — dedi Memleket basshysy.
Qasym-Jomart Toqaev Konstıtýtsııa mátinin jazýǵa ózi de tikeleı atsalysqanyn erekshe atap ótti.
— Ár sózine muqııat qarap, ár babyna erekshe nazar aýdardym. Men úshin bul — eń aldymen azamattyq paryz. Máselen, Konstıtýtsııada biz halqymyz úshin kıeli «Táýelsizdik» jáne «Egemendik» sózderin bas árippen jazatyn boldyq. Munyń tereń máni bar. Biz osylaısha árbir uǵym-túsinikke úlken jaýapkershilikpen qarap, tutas qoǵam sanasyna, ásirese, óskeleń urpaqtyń boıyna eldik qasıetterdi sińiremiz, — dedi ol.
Jalpy, Konstıtýtsııa halqymyzdyń dúnıetanymyna jáne ozyq zańnama talaptaryna saı jazylǵany aıtyldy.
— Qazaqstannyń Konstıtýtsııasy kásibı turǵydan óte sapaly daıyndalǵan qujat dep kúmánsiz aıtýǵa bolady. Osy aýqymdy jumysqa bilikti zańgerlermen qatar, fılologııa salasynyń tájirıbeli ǵalymdary men qazaq tili mamandary da belsene qatysty. Munyń bári qazirgi qazaq tiliniń áleýeti men kúsh-qýatynyń aıqyn kórinisi ekeni sózsiz, — dedi Prezıdent.
Aıta keteıik, Memleket basshysy Qasym-Jomart Toqaev Halyqaralyq «Qazaq tili» qoǵamynyń H quryltaıynda sóz sóılep jatyr.
Prezıdent qazaq tiliniń abyroı-bedelin arttyrý úshin tabandy jumys isteý kerektigin aıtýda.
