Konstıtýtsııada tabıǵatty qorǵaýǵa azamattyq jaýapkershilikti bekitý mańyzdy – Sergeı Ponomarev
ASTANA. KAZINFORM – Májilis depýtaty Sergeı Ponomarev Konstıtýtsııada Qazaqstan azamattarynyń tabıǵatty saqtaýǵa qatysty azamattyq jaýapkershiligin bekitýdiń mańyzyn qoldady. Bul týraly ol Konstıtýtsııalyq komıssııanyń úshinshi otyrysynda aıtty.
Depýtattyń aıtýynsha, elimizdiń Ata zańynda tabıǵatty qorǵaý mindetin aıqyndaý qazirgi ekologııalyq kún tártibine saı keledi. Ol Memleket basshysy bastamashylyq etken «Taza Qazaqstan» baǵdarlamasy ekologııany qorǵaýdyń árbir azamat úshin qanshalyqty mańyzdy ekenin naqty kórsetkenin atap ótti.
– Biz – Qazaqstan halqy birtutaspyz jáne qazaq jerinde memlekettilikti nyǵaıta otyryp, taza, turaqty, jaıly elde ómir súrgimiz keledi. Tabıǵatqa qamqorlyq jasaýdyń mańyzyn konstıtýtsııalyq túrde bekite otyryp, qazirgi jáne bolashaq urpaq aldynda joǵary jaýapkershilik tanytamyz, - dedi depýtat.
Otyrys barysynda tabıǵatty qorǵaýǵa qatysty Konstıtýtsııada kózdelýi múmkin birqatar normalar aıtyldy. Atap aıtqanda:
– Qazaqstan Respýblıkasynyń azamattary tabıǵatty saqtaýǵa jáne tabıǵı baılyqqa qamqorlyqpen qaraýǵa mindetti;
– laýazymdy tulǵalardyń adamdardyń ómiri men densaýlyǵyna qaýip tóndiretin derekter men faktilerdi jasyrýy zańǵa sáıkes jaýapkershilikke ákep soqtyrady.
Sondaı-aq Sergeı Ponomarev sóz bostandyǵy, tsenzýraǵa tyıym salý jáne aqparatty erkin alý men taratý quqyǵyna qatysty Konstıtýtsııa normalarynyń mańyzdylyǵyna toqtaldy.
– Biz komıssııa jumysyn tikeleı efırde júrgizý arqyly ózimizdiń ashyq ekenimizdi kórsetemiz. Konstıtýtsııalyq ózgerister óz tabıǵaty boıynsha memlekettiń jáne qoǵamdyq kelisimniń negizderin ózgertedi, sondyqtan olar jabyq rejımde talqylana almaıdy. Tikeleı efır – tek tehnıkalyq format emes, qoǵamǵa senimniń jáne memlekettiń dıalog júrgizýge daıyn ekendiginiń kórsetkishi, - dedi ol.
Depýtattyń aıtýynsha, elimizde jarııalanǵan «Halyq únine qulaq asatyn memleket» tujyrymdamasy men ınstıtýtsıonaldyq jaýapkershilik qaǵıdattaryn eskersek, Konstıtýtsııalyq komıssııa jumysynyń ashyq formatta ótýi osy baǵyttyń qısyndy jalǵasy bolyp tabylady.
– Ashyq otyrystar – bul tek aqparattandyrýǵa ǵana emes, sonymen qatar azamattardy bul protseske tartýǵa jasalǵan qadam, - dep túıindedi Sergeı Ponomarev.
Aıta keteıik, 2026 jyldyń 22-24 sáýiri aralyǵynda Qazaqstan astanasynda qorshaǵan orta men sý resýrstary problemalaryn talqylaý jáne ózekti máseleler boıynsha kelisimderge qol jetkizý úshin memleket basshylaryn, sarapshylar jáne halyqaralyq uıymdardyń jetekshilerin bir alańda biriktiretin alǵashqy Óńirlik ekologııalyq sammıt ótedi.