Konstıtýtsııada saıası partııalar men kásipodaqtardy qarjylandyrýǵa tyıym salynǵan tizimdi tolyqtyrý usynyldy

ASTANA. KAZINFORM — Konstıtýtsııalyq komıssııa múshesi, Májilis depýtaty Snejanna Imasheva Konstıtýtsııaǵa saıası partııalar men kásiptik odaqtarǵa qatysty qandaı túzetýler usynylǵanyn aıtyp berdi. 

Onyń aıtýynsha, Konstıtýtsııasynyń 5-babynyń 3-tarmaǵyna ózgeris engizý usynylyp otyr. Atap aıtqanda, Konstıtýtsııa arqyly qorǵalatyn qundylyqtarǵa qaýip tóndiretin maqsattary men áreketteri bar birlestikterdi qurýǵa jáne olardyń qyzmetine tyıym salýǵa baılanysty konstıtýtsııalyq shekteýlerdi jańartý qajet.

— Sondyqtan tyıym salynǵan maqsattar men áreketterdiń tizbesin naqtylaý, sonyń ishinde soǵysty qozdyrý men ulttyq qaýipsizdikke nuqsan keltirýdi naqtylaý yqtımal olqylyqtardy joıyp, aldyn ala qorǵaýdy kúsheıtedi. Bul rette qaýipsizdik mindetteri men Konstıtýtsııada kepildik berilgen birlestikter bostandyǵy arasynda tepe-teńdik saqtalady, — dep túsindirdi Snejanna Imasheva.

Budan bólek, usynylǵan túzetýler saıası partııalar men kásipodaqtar qyzmetine syrttan yqpal etýge jol bermeý tetikterin naqtylap, olardy kúsheıtýdi kózdeıdi.

Qoldanystaǵy basqa memleketterdiń partııalary men kásipodaqtarynyń, sondaı-aq dinı negizdegi saıası partııalardyń qyzmetine tyıym salýmen qatar, qosymsha shekteý engizý máselesi qarastyrylyp jatyr.

— Qarjylandyrýdyń tyıym salynǵan kózderin naqtylaý usynylady: sheteldik memleketterden bólek, azamattyǵy joq adamdardy, sheteldik qatysýy bar zańdy tulǵalardy jáne ózge de sýbektilerdi kórsetý kózdelip otyr. Bul yqtımal aınalyp ótý tetikterin jabýǵa jáne birlestikterdiń konstıtýtsııalyq bostandyǵyn saqtaı otyryp, qarjylandyrýdyń ashyqtyǵyn arttyrýǵa múmkindik beredi, — dep atap ótti komıssııa múshesi.

Buǵan deıin Snejanna Imasheva Konstıtýtsııanyń adamı kapıtal týraly babyn tolyqtyrý usynǵan edi.