Konstıtýtsııada menshiktiń barlyq túrin teń qorǵaýdy bekitý usynyldy

ASTANA. KAZINFORM — Jańa Konstıtýtsııa jobasynda menshik nysandarynyń konstıtýtsııalyq anyqtamasyn keńeıtýdi jáne olardyń teń qorǵalýyn bekitýdi usyndy. Bul týraly Konstıtýtsııalyq reforma jónindegi komıssııanyń otyrysynda Májilis depýtaty Azat Perýashev málimdedi.

- «Aq jol» partııasy ulttyq bıznes pen kásipkerlerdiń saıası ókili retinde jańa Konstıtýtsııa jobasyn talqylaý aıasynda taǵy bir ınstıtýtsıonaldy sıpatqa ıe máselege nazar aýdarǵysy keledi. Investıtsııalyq tartymdylyq pen jaıly bıznes klımat úshin kez kelgen ekonomıkadaǵy menshik ınstıtýtynyń mártebesi asa mańyzdy ról atqaratyny belgili. Sonymen qatar, búginde búkil álemde bolyp jatqan úderister menshik qatynastaryn retteýdi, jańǵyrtýdy qajet etetinin kórsetip otyr. Qoldanystaǵy Konstıtýtsııada menshiktiń tek eki túri ǵana kózdelgen – memlekettik jáne jekemenshik. Al zamanaýı ekonomıster keminde 5-6 túrli menshik túrin bólip kórsetedi, - dedi A. Perýashev.

Onyń aıtýynsha, Fınlıandııa, Lıtva, Latvııa, Ázerbaıjan men basqa da elderde memlekettik jáne jekemenshikpen qatar, konstıtýtsııalarynda mýnıtsıpaldyq menshik túri kórsetilgen. Qytaı, Brazılııa, Úndistan konstıtýtsııalarynda olarǵa kooperatıvtik menshik qosylǵan. Birqatar elde ekonomıkany ártaraptandyrýdy yntalandyrý maqsatynda menshik túrleriniń tizbesi múldem shektelmegen.

- Osyǵan baılanysty «Aq jol» partııasy atynan jańa Konstıtýtsııa jobasynyń 8-babynyń 1-tarmaǵyn kelesi redaktsııada baıandaýdy usynamyn: «Qazaqstan Respýblıkasynda menshiktiń barlyq túri tanylady, olarǵa kepildik beriledi jáne teń qorǵalady». Bul norma ekonomıkanyń damýyna, bıznes, qoǵam jáne memleket arasyndaǵy qatynastardyń kúsheıýine oń yqpal etip, barlyq menshik túrin qoldaý men qorǵaýdy bildiredi dep senimdimiz, - dedi depýtat.
Aıta keteıik, Konstıtýtsııalyq reforma jónindegi komıssııanyń IX otyrysy 7 aqpan kúni ótti.

Onda Memlekettik keńesshi Erlan Qarın nelikten jańa Konstıtýtsııa qabyldaý qajet ekenin túsindirdi.