Konstıtýtsııada gýmanıtarlyq qundylyqtardy qalyptastyrý mańyzdy dep sanaımyn - Prezıdent
ASTANA. KAZINFORM – Komıssııa músheleri usynǵan zańnamalyq erejelerde adam quqyqtary bárinen joǵary turatyny jáne adam kapıtaly eń qymbat qundylyq ekeni aıqyn kórsetilgen. Sondaı-aq ár azamattyń óz áleýetin iske asyrýǵa teńdeı múmkindik beretin ádil qoǵam qurýdy kózdeıdi. Bul pikirdi Prezıdent Volonterler forýmynda aıtty.
«Ǵylym-bilim, ınnovatsııa salalaryn damytýdyń mańyzyna erekshe nazar aýdarylyp otyr.
Jańa tarıhı kezeńde elimizdiń tsıfrlyq dáýirge beıimdelýi jetkiliksiz. Jasandy ıntellekt jáne basqa da ozyq tehnologııalar bizdiń qoǵamǵa qyzmet etýi qajet. Sondyqtan damý kóshiniń baǵytyn naqty aıqyndaýymyz kerek. Ata zańymyzda adamgershilik qundylyqtardy erekshelep, bólek jazý usynyldy. Bul da – óte mańyzdy.
Basqasha aıtqanda, adam jasandy ıntellektige qyzmet etpeıdi, kerisinshe, adamzattyń aqyl-oıynan týyndaǵan jasandy ıntellekt turmys-tirshiliktiń barlyq salasynda tolaıym tabysqa jetýi úshin azamattarǵa kómektesedi.
Konstıtýtsııada gýmanıtarlyq qundylyqtardy qalyptastyrý mańyzdy dep sanaımyn. Atap aıtqanda, jalpyulttyq biregeılikti nyǵaıtýǵa, tabıǵatty aıalaýǵa basymdyq berý jóninde sóz qozǵap otyrmyz», - dedi Qasym-Jomart Toqaev.
Prezıdent bul másele baıandamashylardyń sózinde qamtylǵanyn atap ótip, ıdeıalardy qoldaıtynyn jetkizdi. Sonymen qatar baı mádenı muramyzdy saqtaýǵa, dáripteýge baǵyttalǵan volonterlerimizdiń qyzmetin de qýattaıtynyn rastady.
«Búkil memlekettik júıeni qaıta quryp, bılik pen qoǵamnyń yqpaldastyǵyn jetildire túsedi.
Usynylǵan túzetýlerdiń ishinde jaýapty ári jasampaz otanshyldyq týraly ıdeıa bar.
Patrıotızm – qur uran emes. Bul qasıetti uǵymǵa jaýapkershilikpen qaraǵan abzal. Men bul jaıynda jaqynda ótken Ulttyq quryltaı otyrysynda aıtqan bolatynmyn.
Otanshyl azamat degenimiz – jaýapkershiligi joǵary jáne jasampaz azamat.
Men elimizdegi árbir eriktini – barshańyzdy dál osyndaı naǵyz otanshyl azamattar dep sanaımyn. Jaýapty ári jasampaz patrıotızm ıdeıasy árbir volonterdiń janyna jaqyn. Meniń buǵan esh kúmánim joq.
Árbir azamat óziniń jáne qoǵamnyń ıgiligi jolynda kúndelikti adal eńbek etip, álemdi jaqsarta túsýge umtylýǵa tıis. Otanǵa degen shynaıy súıispenshilik – osy.
Tanymal qoǵam qaıratkeri pastor Martın Lıýter Kıng «I have a dream», ıaǵnı «Meniń de armanym bar» degen edi. Sondyqtan «myna álemdi jaqsarta túsemin» dep armandańyzdar. Murattaryńyzǵa jetesizder dep oılaımyn», - dedi Memleket basshysy.
Ol súıikti Otanymyzdy kórkeıtý, ıaǵnı Zań men tártip ústemdik qurǵan, Ádiletti, Qaýipsiz ári Taza Qazaqstandy qurý – barshamyzǵa ortaq mindet ekenin eske saldy
«Álemdegi ahýaldy kórip-bilip otyrsyzdar. Túrli qaqtyǵystar men shıelenister ýshyǵyp, bolashaqty boljaý qıynǵa soǵýda.
Soǵan qaramastan elimiz ósip-órkendep keledi. Biz tabandy eńbektiń arqasynda barlyq maqsat-muratymyzǵa jetemiz. Kez kelgen syn-qaterge tótep beremiz. Óskeleń urpaqtyń kózi ashyq, kókiregi oıaý, uqypty, tártipti, jınaqy bolǵany, jaqsy men jamandy aıyra bilgeni aıryqsha mańyzdy.
Taǵy da atap ótkim keledi: men halqymyzdyń, ásirese, jas býynnyń kúsh-jigerine, jasampaz rýhyna senemin.
Qazaqstan – bizdiń jalǵyz Otanymyz, bárimizdiń qasterli mekenimiz. Elimizdi eshkim syrttan kelip kórkeıtip bermeıdi. Qazaqstannyń myqty, qýatty, ozyq bolǵany tek bizge ǵana kerek.
Súıikti Otanymyzdy kórkeıtý, ıaǵnı Zań men tártip ústemdik qurǵan, Ádiletti, Qaýipsiz ári Taza Qazaqstandy qurý – barshamyzǵa ortaq mindet. Osy mindetti oryndaý úshin bárimiz bir qoǵam bolyp eńbek eteıik, dostar!» - dedi Qasym-Jomart Toqaev
Forýmda sondaı-aq Parlament Májilisiniń depýtaty, «Ulttyq volonterlik jeli» zańdy tulǵalar birlestiginiń jetekshisi Vera Kım, «Medıtsına jastary» respýblıkalyq qoǵamdyq birlestiginiń tóraǵasy Abylaıhan Ábdirash, Dosco qoǵamdyq qorynyń dırektory Aınur Aımurzına, ekovolonter Baýyrjan Jaqypov, tarıhı-mádenı muralar salasyndaǵy volonter Andreı Lýtoshkın, Halyqaralyq volonterler jylynyń Eýropa men Ortalyq Azııa boıynsha aımaqtyq úılestirýshisi, BUU-daǵy qazaqstandyq erikti Zarına Mırabdýllaeva sóz sóıledi.
Memleket basshysy Volonterler forýmyna qatysýshylarmen birge sýretke tústi.
Aıta keteıik, Toqaev Úkimetke eriktiler isin damytýdy kózdeıtin jańa qujat ázirleýdi tapsyrdy.