Konstıtýtsııada eldiń ákimshilik-aýmaqtyq qurylymyn konstıtýtsııalyq zańmen aıqyndaý qajet – Danııa Espaeva

ASTANA. KAZINFORM – Konstıtýtsııada eldiń ákimshilik-aýmaqtyq qurylymyn konstıtýtsııalyq zańmen aıqyndaý qajet. Bul týraly Konstıtýtsııalyq reformalar jónindegi komıssııanyń otyrysynda Májilis depýtaty Danııa Espaeva aıtty.

– Parlamenttik reforma bastamasy búkil Ata zańdy qaıtadan, tereń zerdeleýdi talap etip otyr. Qoǵamdyq qatynastyń ózgerýi, jańa tehnologııalar, tsıfrlandyrý jáne jasandy ıntellekt qosymsha quqyqtyq retteý sharalar qajettigin týdyrdy. Qazirgi zamanǵy syn-qaterler men adam quqyqtarynyń tereńirek rettelýi jańartylǵan zańnamalyq bazany qajet etedi. Munyń bári negizgi zańda kórinis tabýy kerek. Jekelegen túzetýler mundaı ózgeristerdi ornyqty iske asyrý úshin qajetti tutastyq pen aıqyndyqty qamtamasyz etpeıdi, - dedi Májilis depýtaty. 

Onyń aıtýynsha, elimizde arnaıy ekonomıkalyq rejımniń paıda bolýy aýmaqtardy damytý men ınvestıtsııa tartýdaǵy Qazaqstannyń ekonomıkalyq múddelerine jaýap beredi. Bul rette ákimshilik-aýmaqtyq qurylymǵa yqpal etýi múmkin degen qaýiptiń aldyn alǵan jón. Osyǵan oraı respýblıkanyń egemendigi onyń búkil aýmaǵyna taralady jáne memleket aýmaǵynyń qolsuǵylmaıtyndyǵyn, tutastylyǵyn jáne ajyramastyǵyn qamtamasyz etedi. 

– Osyǵan oraı ákimshilik-aýmaqtyq qurylym máselesin zańmen emes, konstıtýtsııalyq zańmen aıqyndaýdy usynamyn. Bul biz kúsheıtýge tıis konstıtýtsııalyq kepil. Sondyqtan keshe qolymyzǵa alǵan jobanyń 2-babyn tıisti erejemen bekitýdi usynamyn, - dedi Danııa Espaeva.

Májilis depýtaty memleketke zamanaýı jáne ornyqty quqyqtyq baza qajet ekenin atamp ótti. 

– Jańa Konstıtýtsııa - biz kútken reformalar úshin eń joǵary zańdylyq aktisi. Ol Qazaqstan Respýblıkasy memlekettiliktiń jańa kezeńine qadam basyp, negizgi zańy búkil el damýynyń kepiline aınalǵanynyń aıǵaǵy bolmaq, - dedi ol. 

Aıta keteıik, Konstıtýtsııaǵa qylmystyq protseste prokýror men advokattyń mártebesin teń etetin norma engizilmek.