Konstıtýtsııada dinniń memleketten bólek ekeni anyq jazylady — Erlan Qarın

ASTANA. KAZINFORM — Memlekettik keńesshi — Konstıtýtsııalyq komıssııa tóraǵasynyń orynbasary Erlan Qarın Konstıtýtsııanyń jańa mátinine dinge qatysty qandaı tolyqtyrýlar bolǵanyn aıtyp berdi. 

Memlekettik keńesshiniń aıtýynsha, jańa Konstıtýtsııada qoǵamdaǵy jańa qundylyqtar aıqyndalyp otyr.

− Osy kúnderi keı azamattar «Jańa Konstıtýtsııa nege kerek? Qandaı qajettilik boldy?» degen suraqtardy kóremiz. Sebebi memleket ózgerdi, qoǵam ózgerdi. Sońǵy jyldardyń ózinde qoǵamdyq mentalıtet ózgerip jatyr. Sonyń nátıjesinde jańa qoǵamdyq suranys, jańa talaptar paıda bolýda. Jańa Konstıtýtsııa osy talaptar men suranystarǵa jaýap beredi, − dedi Erlan Qarın Konstıtýtsııalyq komıssııanyń besinshi otyrysynda.

Sonyń biri — din men memleket ara-jigin naqty belgileý. 

− Jańa redaktsııadaǵy Konstıtýtsııanyń 5-babynda «Din memleketten bólek» dep anyq jazylǵan. Óz kezeginde 30-bapqa «Rýhanı-dinı bilim berý uıymdaryn qospaǵanda, Qazaqstan Respýblıkasynyń uıymdary men mekemelerinde bilim men tárıbe berý júıesi zaıyrlyq sıpatqa ıe» degen jańa norma qosylyp otyr. Munyń barlyǵy mazmuny jaǵynan da, maǵyna jaǵynan da óte mańyzdy sheshim, − dedi Erlan Qarın.

Taǵy bir qoǵamdaǵy talaptyń biri — jat mádenı modelder men minez-qulyq normalaryn kúshtep engizý áreketterine degen alańdaýshylyq. Sondyqtan Konstıtýtsııada nekeniń — er men áıeldiń erikti ári teń quqyly odaq ekeni alǵash ret bekitilýde.

− Mundaı sheshim dástúrli qundylyqtardy eń joǵarǵy quqyqtyq deńgeıde qorǵaýǵa baǵyttaıdy. Ekinshi jaǵynan, bul áıelderdiń quqyqtaryn qorǵaýdy kúsheıtedi. Áıelderdiń quqyǵyn qorǵaý sońǵy jyldardaǵy qoǵamdaǵy úlken talap-suranystardyń biri. Jańa Konstıtýtsııa bul suranystarǵa da jaýap beredi. Dástúrli qundylyqtardy qorǵaý adam quqyqtaryna qarsy emes, kerisinshe olarmen úılesimdi ushtastyryp otyr, − dep túıindedi Memlekettik keńesshi. 

Aıta ketelik Erlan Qarın Konstıtýtsııanyń basty erekshelikteriniń biri adam quqyqtaryna baǵdarlaýynda degen edi.