Konstıtýtsııada bıliktiń bóliný qaǵıdatyn bekitetin norma jańa redaktsııada tujyrymdaldy

ASTANA. KAZINFORM – Konstıtýtsııada bıliktiń bóliný qaǵıdatyn bekitetin norma jańa redaktsııada tujyrymdaldy. Bul týraly Konstıtýtsııalyq reformalar jónindegi komıssııanyń 4-otyrysynda Konstıtýtsııalyq sot tóraǵasynyń orynbasary Baqyt Nurmahanov aıtty.

- Álemdik tájirıbede «Konstıtýtsııalyq qurylym negizderi» bóliminde memlekettiń uıymdastyrylýyn aıqyndaıtyn, egemendigin, aýmaqtyq tutastyǵyn jáne ózge de asa mańyzdy qaǵıdattaryn bekitetin irgeli erejeler kórinis tabady. Jobada bul bólimde elimizdiń quqyqtyq mártebesi men jalpy kelbeti anyqtaldy. Qazaqstan Respýblıkasy demokratııalyq zaıyrly, quqyqtyq jáne áleýmettik memleket retinde tanylady. Onyń eń qymbat qundylyǵy adam jáne ómiri, quqyqtary men bostandyqtary. Bıliktiń bóliný qaǵıdatyn bekitetin norma jańa redaktsııada tujyrymdaldy. Memlekettik qoldanystaǵy quqyǵy máselelerine arnalǵan konstıtýtsııalyq erejeler naqtylandy, - dedi ol.

Onyń atap ótýinshe, jekelegen óńirlerde konstıtýtsııalyq zańdar arqyly qarjy salasyna qatysty arnaıy quqyqtyq rejım belgilenýine negiz kózdeledi.

- Osyndaı tártippen jedel qarqynmen damıtyn qala arnaıy quqyqtyq rejımi belgilenýi múmkin. Ol ekonomıkany tıimdi ilgeriletý maqsatynda júzege asyrylmaq jáne Astana halyqaralyq qarjy ortalyǵy men Alataý qalasyn damytýmen baılanysty. Bul normalardy konstıtýtsııanyń basqa negizgi baptarymen tyǵyz baılanysta qaraý kerek. Atap aıtqanda, respýblıkanyń ákimshilik-aýmaqtyq qurylysy tek konstıtýtsııalyq zańmen belgilenedi dep bekitilmek. «Qazaqstan birtutas memleket, el aýmaǵynyń tutastyǵy, oǵan qol suǵylmaýy men bólinbeýi» degen normalar ózgerissiz qalýda,- dedi Baqyt Nurmahanov.

Buǵan deıin Konstıtýtsııa mátininiń 84 paıyzy túzetilgenin jazǵan edik.