Konstıtýtsııada Bas prokýrordyń bes jyldyq ókilettik merzimi alynyp tastalady

ASTANA. KAZINFORM -  Bas prokýrordyń qorǵalýy mártebesine qatysty ózgerister engiziledi. Bul týraly búgin Konstıtýtsııalyq reformalar jónindegi komıssııanyń ekinshi otyrysynda Ádilet mınıstri Erlan Sársembaev málim etti.

- Konstıtýtsııanyń 83-babynan Bas prokýrordyń bes jyldyq ókilettik merzimi alynyp tastalady. Sonymen qatar, atalǵan tarmaqqa Bas prokýrordyń qorǵalýy mártebesine qatysty ózgerister engiziledi. Atap aıtqanda, Bas prokýror óz ókilettigi merzimi ishinde, qylmys ornynda nemese aýyr jáne asa aýyr qylmys jasaǵanda ustaý jaǵdaılaryn qospaǵanda, Prezıdenttiń kelisiminsiz ustaýǵa, kúzetpen ustaýǵa, kúshtep ákelýge, sot tártibimen belgilenetin ákimshilik jaza qoldanýǵa, qylmystyq jaýaptylyqqa tartýǵa bolmaıdy, - dedi Erlan Sársembaev.

Onyń aıtýynsha, osyǵan uqsas túzetýler Konstıtýtsııanyń 71-babynda da jáne basqa da baptarda tıisinshe Konstıtýtsııalyq Sottyń tóraǵasy men sýdıalaryna, barlyq turaqty sýdıalarǵa, sondaı-aq QR Adam quqyqtary jónindegi ýákilge qatysty kózdeledi.

Budan buryn habarlanǵandaı, Astanada Konstıtýtsııalyq komıssııanyń ekinshi otyrysy bastaldy. Іs-shara konstıtýtsııalyq reformaǵa baılanysty túsken usynystardy talqylaýǵa arnaldy. 

QR Konstıtýtsııalyq Sotynyń tóraıymy Elvıra Ázimova komıssııaǵa eki myńnan astam usynys túskenin, olardyń barlyǵy birtutas jınaqtalǵan kestege toptastyrylǵanyn atap ótti.