Konstıtýtsııada azamattardyń tsıfrlyq ortadaǵy quqyqtary qorǵalady — Erkejan Kúntýǵanqyzy

ASTANA. KAZINFORM — Jańa Konstıtýtsııa jobasy azamattardyń quqyqtyq qorǵalýyn kúsheıtedi. Bul týraly Konstıtýtsııalyq reformalar jónindegi komıssııanyń 9-otyrysynda «Jibek joly» telearnasynyń dırektory Erkejan Kúntýǵanqyzy aıtty. 

— Jańa Konstıtýtsııada adam kapıtalyn, ǵylym men ınnovatsııany damytý memlekettiń strategııalyq basymdyǵy ekeni kórsetilgen. Qarapaıym tilmen aıtqanda, bilim men zııatkerlik eldiń basty qundylyǵy retinde resmı túrde bekitilmek. Jastar úshin bul — bilim alýǵa, ǵylymmen aınalysýǵa jáne jan-jaqty damýǵa múmkindik, al qoǵam úshin — tek tabıǵı resýrstarǵa ǵana emes, aqyl men talantqa negizdelgen ekonomıkaǵa qadam, — dedi ol.

Sondaı-aq telearna basshysy azamattardyń tsıfrlyq ortadaǵy quqyqtaryn qorǵaý, ıaǵnı Konstıtýtsııa deńgeıinde ınternet pen vırtýaldy ómirge qatysty qaǵıdalar bekitilip otyrǵanyna nazar aýdartty.

— Bul jeke derekterdi qorǵaý, jelidegi qaýipsizdik jáne tipti óz pikirin erkin bildirý naqty quqyqtyq negizge ıe bolady degen sóz. Eldiń tsıfrlyq keńistigi beı-berekettik emes, erejege negizdele alady. Bul árıne, jýrnalıster, blogerler jáne jalpy onlaın bıznes úshin mańyzdy. Jańa Konstıtýtsııa jobasy azamattardyń quqyqtyq qorǵalýyn da kúsheıtedi. Ádildik qaǵıdattary, kinásizdik prezýmptsııasy normalary bekitiledi. Bul degenimiz, adam quqyqyǵynyń jan-jaqty naqty qorǵalǵany týraly, — dedi Erkejan Kúntýǵanqyzy.

Aıta keteıik, Kazinform agenttiginiń qazaq jáne orys tilindegi Telegram arnasy osy otyrystan mátin translıatsııasyn berip jatyr.