Konstıtýtsııada avtorlyq quqyq pen zııatkerlik menshikti qorǵaý kúsheıtiledi

ASTANA. KAZINFORM — Konstıtýtsııada avtorlyq quqyq pen zııatkerlik menshikti qorǵaý kúsheıtiledi. Bul týraly Konstıtýtsııalyq reformalar jónindegi komıssııanyń 9-otyrysynda «Jibek joly» telearnasynyń dırektory Erkejan Kúntýǵanqyzy aıtty.

— Zııatkerlik jáne shyǵarmashylyq eńbekti qorǵaýdy atap ótkim keledi. Jańa Konstıtýtsııa jobasynda avtorlyq quqyq pen zııatkerlik menshikti qorǵaý kúsheıtiledi. Jýrnalıster, avtorlar, kreatıvti ındýstrııa ókilderi, IT salasy men ǵylym úshin bul — olardyń eńbekteri memleket tarapynan qorǵalady degen sóz. Bul da meniń oıymsha, sapaly kontentke jol ashady. Óıtkeni osyǵan deıin dál osy avtorlyq quqyq eń kúrdeli máselelerdiń biri bolyp keldi. Muny men osy salaǵa qatysy bar maman retinde aıtyp otyrmyn, — dedi Erkejan Kútýǵanqyzy.

Onyń aıtýynsha, Konstıtýtsııa jobasynda zańdy tetikter arqyly jastardyń saıasatqa kelýine jáne sheshýshi kezeńderge qatysýyna múmkindikter qarastyrylǵan. Bul – saıası júıeni jańartýǵa jáne jańa býynnyń qayptasýyna múmkindik dep bilý kerek. 

— Alǵash ret konstıtýtsııalyq deńgeıde tabıǵatty saqtaý jáne bolashaq urpaq aldyndaǵy jaýapkershilik bekitilip otyr. Bul — taza ári qaýipsiz ortada ómir súrgisi keletin qoǵam úshin. Jalpy alǵanda, jańa Konstıtýtsııa jobasy túsinikti erejelerdi qalyptastyryp, quqyqtardy qorǵaýdy kúsheıtedi. Bul búgin men qatar bolashaqqa baǵyttalǵan mazmundy qujat. Biz osy tusta atalǵan qujattyń aýqymyn kórip, túsinip, zańdaǵy ózgerister týraly aqparatty kórermenge túsindirip jáne olarmen keri baılanys jasaýdy toqatpaımyz, — dedi ol.

Aıta keteıik, Kazinform agenttiginiń qazaq jáne orys tilindegi Telegram arnasy osy otyrystan mátin translıatsııasyn berip jatyr.