Konstıtýtsııada alǵash ret tabıǵatqa uqypty qaraý mindeti bekitildi
ASTANA. KAZINFORM — Búgin Qazaqstan Respýblıkasynyń jańa Konstıtýtsııasy resmı túrde kúshine endi. Bul qujat memleket, qoǵam jáne árbir azamattyń qorshaǵan ortany qorǵaý men saqtaýdaǵy jaýapkershiligin múlde jańa deńgeıge kóteredi. Bul týraly Ekologııa jáne tabıǵı resýrstar mınıstrligi málim etti.
— Qazaqstan tarıhynda alǵash ret árbir azamattyń tabıǵatqa jáne qorshaǵan ortaǵa uqypty qaraý mindeti konstıtýtsııalyq deńgeıde naqty bekitildi. Bul — ekologııalyq jaýapkershilikti nyǵaıtýǵa jáne qoǵamda jańa ekologııalyq mádenıetti qalyptastyrýǵa baǵyttalǵan mańyzdy qadam. Konstıtýtsııanyń preambýlasynda azamattardyń keler urpaq aldyndaǵy jaýapkershiligi aıqyndalǵan. Bul tabıǵı resýrstardy utymdy ári uqypty paıdalanýdyń mańyzymen tikeleı baılanysty. Sonymen qatar, Konstıtýtsııanyń 37-babynda árbir azamattyń tabıǵatty qorǵaý mindeti bekitilgen, — delingen mınıstrliktiń habarlamasynda.
Dál osy qaǵıdattar búginde «Taza Qazaqstan» jalpyulttyq bastamasynyń negizin quraıdy. Memleket basshysy Qasym-Jomart Kemelúly Toqaev birneshe márte atap ótkendeı, bul joba — qorshaǵan ortanyń tazalyǵyna, oıdyń tazalyǵyna jáne joǵary azamattyq jaýapkershilikke negizdelgen jańa qoǵamdyq mádenıetti qalyptastyrýǵa baǵyttalǵan.
— Joba iske qosylǵannan bergi nátıjeler onyń aýqymyn aıqyn kórsetedi. Respýblıka boıynsha 5,2 mıllıon aǵash otyrǵyzylyp, 2,2 mıllıon tonna qaldyq jınaldy, sondaı-aq 3,4 mıllıon gektar aýmaq tazartyldy. Eń bastysy, bul bastama shyn máninde búkilhalyqtyq jobaǵa aınaldy. Sebebi jyl saıyn ótkiziletin ekologııalyq aktsııalarǵa 6,5 mıllıonnan astam adam belsendi qatysady. Ekologııaǵa degen shynaıy janashyrlyq ár adamnyń kúndelikti qarapaıym is-áreketinen bastalady. Qoqys qaldyrmaý, sýdy únemdep paıdalaný, aǵash otyrǵyzý, óz aýlasy men qoǵamdyq oryndardyń tazalyǵyn saqtaý — osyndaı qarapaıym qadamdardyń nátıjesinde qalalarymyz ben aýyldarymyz taza, jaıly ári kórikti bola túsedi. Senbilikterge belsendi qatysý da osy ıgi istiń mańyzdy bóligi, — dep habarlady vedomstvodan.
Búgin tabıǵatqa jáne qorshaǵan ortaǵa uqypty qarap, biz keleshek urpaq úshin qolaıly ári qaýipsiz ómir súrý ortasyn qalyptastyryp, elimizdiń ornyqty damýyna óz úlesimizdi qosamyz. Qazaqstan Respýblıkasy Ekologııa jáne tabıǵı resýrstar mınıstrligi barlyq el turǵyndaryn «Taza Qazaqstan» bastamasyn belsendi qoldaýǵa jáne qorshaǵan ortaǵa jaýapkershilikpen qaraýǵa shaqyrady. Naǵyz ekologııalyq mádenıet árqashan ár adamnyń jeke úlgisinen bastalady, al aýqymdy qoǵamdyq ózgerister árkimniń ózinen bastaý alatyn shaǵyn qadamdarynan quralady.
Eske sala keteıik, búgin jańa Konstıtýtsııa kúshine endi. Jalpyhalyqtyq referendým nátıjesinde qabyldanǵan tarıhı qujat memlekettik basqarý júıesin, qoǵamnyń damý baǵytyn túbegeıli ózgertpek.
