Konstıtýtsııada advokatýranyń mártebesin bekitý azamattarǵa senim uıalatady — advokat
ASTANA. KAZINFORM — Respýblıkalyq advokattar alqasynyń tóraǵasy Mádı Myrzaǵaraev Jibek Joly telearnasynyń «Búgin LIVE» baǵdarlamasynda jańa Konstıtýtsııada advokatýranyń jeke ınstıtýt retinde mártebesi bekitilýiniń mańyzyn túsindirdi.
— Advokatýrany konstıtýtsııalyq deńgeıge kóterý jalpy advokatýra qaýymdastyǵynyń tilegi bolatyn. Elimizde kez kelgen zań, basqa da normalar, sheshimder qabyldanǵanda, eń birinshi súıenetin qujatymyz — Konstıtýtsııa. Eger Ata zańda advokatýra derbes ınstıtýt retinde bekitilip, onyń quqyqtary da belgilenip tursa, Quryltaı ártúrli zańdardy qabyldaý barysynda advokatýranyń da róli aıqyndala túsedi, eskeriledi. Sebebi, ol endi — jaı qoǵamdyq birlestik emes, azamattardyń quqyǵyn qorǵaıtyn, konstıtýtsııalyq deńgeıde mártebesi bekitilgen, memleket ózi mańyz berip otyrǵan ınstıtýt. Zańdar osy baǵytta jazylýy tıis, — dedi ol.
Sonymen qatar, Mádı Myrzaǵaraev advokatýranyń konstıtýtsııalyq mártebesin bekitý azamattardyń quqyǵyn qorǵaýǵa tikeleı áser etetinin atap ótti.
— Basyna is túsken, qıyn jaǵdaıǵa tap bolǵan kez kelgen adam birinshi kezekte zańgerge, advokatqa barady. Ol durys oıyn, únin jetkize almaıtyndyqtan, advokat memlekettik organ men azamattyń arasyndaǵy altyn kópirge aınalady. Al advokattyń quqyǵy, múmkindigi shekteýli bolsa, azamattyń da quqyǵy shekteler edi. Sondyqtan advokattyń mártebesin, rólin kóterse, azamattyń da «meniń quqyǵymdy osy advokat qorǵaıdy» degen úmiti, senimi paıda bolady. Atalǵan normanyń kerek sebebi — sol, — dedi ol.
Aıta keteıik, buǵan deıin Qazaqstanda jańa Konstıtýtsııaǵa arnalǵan ǵylymı-praktıkalyq konferentsııa uıymdastyrylǵanyn jazǵanbyz.
