Konstıtýtsııada adam quqyqtary men sóz bostandyǵy tolyq saqtalǵan — Artýr Lastaev

ASTANA. KAZINFORM — Konstıtýtsııalyq reforma jónindegi komıssııanyń VII otyrysynda Qazaqstan Respýblıkasyndaǵy Adam quqyqtary jónindegi ýákil Artýr Lastaev Ata zańnyń jańa jobasynda adam quqyqtary men sóz bostandyǵy tolyq saqtalǵanyn aıtty.

Onyń sózinshe, jańa Konstıtýtsııa jobasynda adam quqyqtary burynǵydan da kúsheıtilgen. Qazaqstan tarıhynda alǵash ret Konstıtýtsııanyń preambýlasynda azamattardyń quqyqtary men bostandyqtaryn múltiksiz saqtaý qaǵıdaty jarııalanyp otyr. Sonymen qatar bul norma memleket qyzmetiniń negizgi prıntsıpteriniń biri retinde bekitilgen.

— Osylaısha adam quqyqtarynyń basymdyǵy memlekettiń barlyq qoǵamdyq ınstıtýtynyń DNQ-syna organıkalyq túrde engizilip otyr. Jıyntyq túrde alǵanda, bul memleket pen azamattar úshin qundylyqtyq baǵdarlardy qalyptastyrady, — dedi Lastaev.

Sondaı-aq ol adam quqyqtaryna arnalǵan bólimniń ataýynyń ózgertilýi olardyń aıryqsha mańyzyn taǵy bir márte aıqyndaıtynyn atap ótti. Atalǵan bólim irgeli túrde úsh negizgi tirekke — quqyqtarǵa, bostandyqtarǵa jáne mindetterge súıenedi.

— Qarapaıym tilmen aıtqanda: men isteı alamyn, men tańdaımyn, men mindettimin. Osy sanattar jeke jáne qoǵamdyq múddeler arasyndaǵy tepe-teńdikti saqtaı otyryp, ruqsat etilgen, erkin jáne mindetti minez-qulyqtyń shegin aıqyndaıdy, — dedi Adam quqyqtary jónindegi ýákil.

Aıta keteıik, jańa redaktsııadaǵy Konstıtýtsııa sóz bostandyǵyna kepildik berip, tsenzýraǵa tikeleı tyıym salýdy naqty bekitedi. Bul týraly «Ádil sóz» sóz bostandyǵyn qorǵaý halyqaralyq qorynyń prezıdenti Qarlyǵash Jamanqulova málimdegen edi.