Konstıtýtsııa jobasynyń memlekettik jáne orys tilindegi mátinderi barynsha jetildirildi - Nurmuhanov
ASTANA. KAZINFORM – Konstıtýtsııa jobasynda quqyqtyq normalardyń tujyrymdary anyq jáne olardyń mazmuny barshaǵa túsinikti etip jazyldy. Bul týraly Konstıtýtsııalyq reformalar jónindegi komıssııanyń HІІ otyrysynda Konstıtýtsııalyq sot tóraǵasynyń orynbasary Baqyt Nurmuhanov aıtty.
- Kelip túsken jáne jumys toptarynyń otyrystarynda komsıssııa músheleri engizgen birqatar usynys «Qorytyndy jáne ótpeli erejeler» degen 11-bólimge baılanysty. Olardy taldaý nátıjeleri boıynsha bul bólimde jańa normalar qarastyryldy. Olar jańa Konstıtýtsııanyń kúshine ený jáne qoldanystaǵy Ata zańnyń kúshin joıý merzimderin belgileıdi. Jekelegen normalar bir palataly Quryltaıǵa kóshýdi jáne onyń saılaýyn ótkizýdi retteıdi. Sonymen qatar bul bólimniń normalary vıtse-prezıdentti jáne Konstıtýtsııada kózdelgen basqa da laýazymdy tulǵalardy taǵaıyndaýǵa, Konstıtýtsııalyq sottyń, Ortalyq saılaý komıssııasynyń jáne Joǵary aýdıtorlyq palatanyń jańa quramdaryn jasaqtaýǵa arnalady, - dedi ol.
Onyń aıtýynsha, zańnamany jańa Konstıtýtsııamen sáıkestendirý jáne elimizdiń qoldanystaǵy quqyǵynyń turaqtylyǵyn qamtamasyz etý máseleleri de qamtyldy. Úkimetke, ortalyq jáne jergilikti memlekttik organdarǵa aqylǵa qonymdy merzimde sharalar qabyldaý júkteledi.
- Túıindi túzetýler birqatar zańǵa engiziledi. Ratıfıkatsııalanǵan halyqaralyq sharttar qoldanystaǵy quqyq quramynda qala beredi. Konstıtýtsııalyq keńes pen Konstıtýtsııalyq sot osyǵan deıin adam quqyqtary salasynda birqatar normatıvtik qaýly qabyldaǵan bolatyn. Olardyń zańdyq kúshi Konstıtýtsııaǵa qaıshy kelmeıtin bóliginde saqtalatyn bolady. Konstıtýtsııa jobasynyń memlekettik jáne orys tilindegi mátinderi barynsha jetildirildi. Termındik jáne semantıkalyq birizdilik qamtamasyz etildi. Quqyqtyq normalardyń tujyrymdary anyq jáne olardyń mazmuny barshaǵa túsinikti etip jazyldy, - dedi Baqyt Nurmuhanov.
Buǵan deıin Konstıtýtsııalyq komıssııaǵa jańa Konstıtýtsııa jobasy boıynsha 10 myńnan astam ótinish túskenin jazǵan edik.