Konstıtýtsııa jobasynyń memlekettik jáne orys tilderindegi mátinderin jetildirý úzdiksiz júrip jatyr

ASTANA. KAZINFORM – Konstıtýtsııa jobasynyń memlekettik jáne orys tilderindegi mátinderin jetildirý jumysy úzdiksiz júrgizilip jatyr. Bul týraly Konstıtýtsııalyq reformalar jónindegi komıssııanyń H otyrysynda Konstıtýtsııalyq sot tóraǵasynyń orynbasary Baqyt Nurmuhanov aıtty.

- Konstıtýtsııa jobasynyń memlekettik jáne orys tilderindegi mátinderin jetildirý jumysy úzdiksiz júrgizilip keledi. Jumys toptary quqyqtyq normalardyń tujyrymdaryn ońtaılandyrý jáne olardyń mazmunyn barshaǵa túsinikti etý maqsatynda qajetti sharalar qabyldap otyr. Termındik jáne semantıkalyq birizdilikti qamtamasyz etýge basa nazar aýdarylyp jatyr. Osylaısha, Úkimet, Parlament, Prezıdent Ákimshiligi bólimderiniń mamandary, Kostıtýtsııalyq komıssııanyń redaktsııalyq-termınologııalyq jumys toby, Halyqaralyq «Qazaq» tili qoǵamy, jańa Ata zań mátini jobasyna jumyldyrylǵan lıngvıst mamandar tarapynan berilgen usynystardyń negizinde redaktsııalyq, stılıstıkalyq túzetýler júrgizildi, - dedi ol.

Onyń aıtýynsha, mundaı túzetýler birneshe normaǵa engizilgen.

- Mysaly, Preambýlada «Uly dalanyń myń jyldyq sabaqtastyǵyn saqtap» degen sózder «Uly dalanyń myńdaǵan jyldyq sabaqtastyǵyn saqtap dep ózgertildi. Mátin boıynsha «neprıkosnovennost» termıni san ret kezdesedi. Qazaq tilinde ol «qol suqpaý», «qol suǵylmaýyshylyq» dep alynyp otyr, - dedi Baqyt Nurmuhanov.

Buǵan deıin volonterlik qyzmet konstıtýtsııalyq deńgeıde bekitiletinin jazǵan edik.