Konstıtýtsııa jobasyndaǵy neke týraly norma áıelderdiń teń quqyǵyna kepildik beredi — depýtat Únzıla Shapaq

ASTANA.KAZINFORM — Qazaqstannyń jańa Konstıtýtsııasy jobasynda neke er men áıeldiń teń quqyqty odaǵy retinde bekitilgen. Bul norma árbir jubaıdyń quqyqtaryn qorǵaýǵa kepildik berý úshin engizilgen. Bul týraly Májilis depýtaty Únzıla Shapaq Astanada ótken Silk Power 2026 alańynda málimdedi.

Іs-shara barysynda Ú.Shapaq konstıtýtsııalyq normalardyń mańyzyna toqtalyp, Konstıtýtsııa memlekettiń negizderi men qoǵamnyń basty qundylyqtaryn aıqyndaıtyn qoǵamdyq kelisim ekenin atap ótti.

Ol sondaı-aq Konstıtýtsııa jobasynda bekitilgen neke týraly normaǵa erekshe toqtaldy. Atalǵan normaǵa sáıkes, neke — memleket tirkeıtin er men áıeldiń teń quqyqty odaǵy bolyp sanalady.

— Er men áıel bastapqydan teń deńgeıde turady, al Konstıtýtsııa olardyń nekede de teń bolyp qalatynyn bekitedi. Sonymen qatar neke eshkimge kúshtep tańylmaýy tıis. Bizdiń dástúrimizde úılený aldynda túrli rásimder jasalady. Alaıda qyz kelisimin bermeıinshe, olardyń eshqaısysy júzege aspaıdy. Memleket Konstıtýtsııada nekeniń tek eki adamnyń erkin kelisimimen ǵana jasalatynyn bekitedi. Al memleket bul odaqty tirkep, keıin nekedegi ár adamnyń quqyǵyn qorǵaýǵa kepildik beredi, — dedi Únzıla Shapaq.

Aıta keteıik, Silk Power 2026 sharasy Astanada úshinshi ret ótip jatyr. Bul alań qoǵamdaǵy áıelderdiń róli men qazirgi zamannyń syn-qaterlerin talqylaý úshin ártúrli saladan kelgen áıel kóshbasshylardy biriktiredi.