Konstıtýtsııa jobasynda turǵyn úıge qolsuǵylmaýshylyq kepildikteri kúsheıtildi - Nurmuhanov
ASTANA. KAZINFORM – Konstıtýtsııa jobasynyń 28-baby 1-tarmaǵyna sot sheshiminsiz turǵyn úıden aıyrýǵa ǵana emes, sonymen qatar turǵyn úıden shyǵarýǵa da jol berilmeıtini týraly tolyqtyrý engiziledi. Bul týraly Konstıtýtsııalyq reformalar jónindegi komıssııanyń HІІ otyrysynda Konstıtýtsııalyq sot tóraǵasynyń orynbasary Baqyt Nurmuhanov aıtty.
- Jańa Konstıtýtsııa jobasy boıynsha Konstıtýtsııalyq komıssııaǵa túrli usynystar kelip jatyr. Azamattar, qoǵam qaıratkerleri, quqyqtanýshylar men uıymdar, komıssııa músheleri jekelegen máselelerge nazar aýdaryp otyr. Olardy zerdeleý aıasynda jobaǵa qosymsha normalar engizildi. Birinshi, Konstıtýtsııalyq komıssııaǵa turǵyn úıge qolsuǵylmaýshylyq kepildikterin kúsheıtý týraly usynystar tústi. Bul másele jaıly keshe Úkimettiń keńeıtilgen otyrysynda Memleket basshysy da aıtty, - dedi ol.
Onyń aıtýynsha, komıssııa músheleri bul taqyryp boıynsha zańnamany jáne halyqarlyq aktilerdi muqııat zerdeledi.
- Adam quqyqtarynyń jalpyǵa birdeı deklaratsııasynyń 12-babyna sáıkes, «eshkim de óz úıiniń qolsuǵylmaýshylyǵyna, ózgelerdiń ozbyrlyqpen nuqsan keltirýine ushyramaýǵa tıis. Ár adamnyń osyndaı zańasyz aralasýdan nemese nuqsan keltirýlerden zań arqyly qorǵalýǵa quqyqy bar». Qazaqstan ratıfıkatsııalaǵan Azamattyq jáne saıası quqyq týraly paktide «árbir adam jeke jáne otbasylyq ómirine ózgelerdiń óz betinshe zańsyz aralasýynan, ozbyrlyq jasap, baspanasynyń qolsuǵylmaýshylyǵyna nuqsan keltirilýden qorǵalýy tıis» delingen, - dedi Konstıtýtsııalyq sot tóraǵasy orynbasary.
Baqyt Nurmuhanov Konstıtýtsııalyq sot óziniń 2024 jylǵy 19 sáýirdegi normatıvtik qaýlysynda turǵyn úı adamnyń jáne onyń otbasy músheleriniń ómir súrý konstıtýtsııalyq quqyǵyn iske asyrý úshin asa mańyzdy ekenin atap ótkenin eske saldy. Ol múliktiń erekshe túri retinde Konstıtýtsııada aıryqsha qorǵaýǵa ıe ekenin atap ótti.
- Qazaqstan Respýblıkasynda turǵyn úıge qolsuǵylmaýshylyq bekitilip, ony tek sot arqyly quqyqtyq qorǵaýǵa kepildik beriledi. Qorytyndylaı kele, 28-baptyń 1-tarmaǵynda sot sheshiminsiz turǵyn úıden aıyrýǵa ǵana emes, sonymen qatar turǵyn úıden shyǵarýǵa da jol berilmeıtini týraly tolyqtyrý kózdeldi, - dedi Baqyt Nurmuhanov.
Buǵan deıin Konstıtýtsııalyq komıssııaǵa jańa Konstıtýtsııa jobasy boıynsha 10 myńnan astam ótinish túskenin jazǵan edik.