Konstıtýtsııa jobasynda «Prezıdent» bólimi tujyrymdamalyq turǵydan qaıta qaraldy

ASTANA. KAZINFORM – Vıtse-prezıdenttiń quqyqtyq mártebesi men ókilettikterin retteıtin jeke bap bolady. Bul týraly búgin Konstıtýtsııalyq reformalar jónindegi komıssııanyń kezekti otyrysynda Konstıtýtsııalyq sot tóraǵasynyń orynbasary Baqyt Nurmuhanov málim etti.

- Jobada «Prezıdent» bólimi tujyrymdamalyq turǵydan qaıta qaraldy. Ózgeristerdiń bir bóligi Prezıdentke qatysty saılaýdy ótkizý jáne ant berý merzimderin bekitedi. Memleket basshysynyń Quryltaımen, Úkimetpen jáne basqa da memlekettik organdarmen ózara is-qımylyna, kadrlyq máselelerge, norma shyǵarmashylyq fýnktsııalaryna qatysty ókilettikterin retteıtin bapqa birqatar túzetý jasaldy, - dedi Baqyt Nurmuhanov.

Onyń aıtýynsha, bul bólimde Vıtse-prezıdenttiń quqyqtyq mártebesi men ókilettikterin retteıtin jeke bap ornalastyryldy. 

Budan buryn habarlanǵandaı, búgin Konstıtýtsııalyq reformalar jónindegi komıssııanyń (Konstıtýtsııalyq komıssııa) tórtinshi otyrysy ótti. 

Kazinform agenttiginiń saıtynda ádettegideı otyrystan tikeleı efır uıymdastyryldy.

Aıta keteıik, Konstıtýtsııalyq komıssııa Memlekettik rámizder týraly konstıtýtsııalyq erejelerdi jetildirdi.